Mga bulak alang kanimo

Bati og nawong si Metodyo. Siya ra g’yud ang lahi sa tanan nila nga unom ka magsuon.Matud pa nga ang inahan ni Metodyo nga si Sabel dili unta gusto nga mahimugso siya sa kalibotan kay naatol man nga sa pagmabdos niini kaniadto may gikabuangang laing babaye ang bana niya nga si Osmundo.

Sa kaguol ni Sabel, migamit kini og contraceptive nga drugas aron unta makuha ang tulo ka buwan niya nga gisabak.

Apan wala gayud motugot ang Ginoo nga malaglag ang bata ug natawo g’yud ang bata. Tungod sa paggamit og contraceptive, nahimo nga bati kaayo ang nawong ni Metodyo.

Karon nga ulitawo na si Metodyo, naibog siya sa dalaga nga anak sa ilang silingan. Guwapa si Sarah ug maoy napili nga rayna dinhi sa ilang baryo niadtong miaging pista.

Nahigugma si Metodyo ni Sarah, apan mauwaw siya nga moduol kay basin og mahadlok kini nga magtan-aw sa iyang hitsura ug ang mahitabo mao nga basin og kuliharan lang siya sa dalaga ug insultohon.

Usa ka hapon nga naglingkod si Sarah sa ilang harden, nahasiga ang mga mata sa dalaga pagkakita niya kang Metodyo.

“Hala, uy, kuyawan man lang ta nimo,” ni Sarah nga mikalit og panampong sa iyang baba sa kalit nga pagtumaw ni Metodyo nga nagdala og gasa -- usa ka pocket book ug pack sa chocolate.

“Dawata ni, Sarah, chocolate ug pocket book,” ni Metodyo pa dungan sa pagtunol sa iyang dala ngadto sa dalaga, apan wala kini dawata sa dalaga ug nasuko pa.

“Unsaon ko man na, di...di ko ana uy... sige ha, diha ka na...”

Gibiyaan si Metodyo sa dalaga. Iyang nakita si Sarah nga paspas kaayo nga misaka sa ilang hagdanan nga wa’y lingilingi.

Gibati ni Metodyo nga wala na siya’y silbi ning kalibotan kay ang babaye nga iyang gipakamutya milikay man niya tungod sa kabati niya’g nawong.

Usa ka hapon, iyang giatngan si Sarah ug may dala siya nga lab-as nga bulak nga iyang kinutlo didto sa ilang tanaman apan wala gihapon kini dawata ni Sarah.

Pila ka adlaw, nakita na lang sa katawhan sa tibuok balangay nga nagbitay na si Metodyo sa dako’ng punoan sa mangga ug sa bulsa sa iyang polo shirt diha ang bulak nga gihatag unta niya ni Sarah apan wala dawata sa dalaga. (Kataposan)