Nag-inusara nga nagkaon si Arthur sa usa ka karenderiya nga nahimutang tupad sa usa ka dako’ng department store. Nakamatikod si Arthur nga mga tindera sa department store ang nangaon sa katupad niyang lamesa.
Human nila og pangaon, nag-iyahay lang pagpagawas sa ilang lipstik ug gikoloran nila pagbalik ang ilang mga ngabil. Mao kini ang gikalingawan sa pagtan-aw ni Art samtang padayon siya nga miusap sa iyang pagkaon.
Gipanghimbisan dayon ni Art ang mga dalaga ug nakadayeg siya sa katahom sa usa kanila. “Wala na g’yud ko’y kuwarta day, kanus-a pa kaha ta ani madato,” matud sa babaye nga hitsuraan.
Nasuta tinuod ni Art nga dili kaayo mahalon ang giorder nga pagkaon sa upat ka tindera. Ang duha gani kanila nagdala pa og ilang kaugalingon nga rice aron sud-an ra ang ilang paliton.
Gitawag ni Art ang silbedora sa karenderiya. “Hatagi ko og softdrinks day.” Diha nga gihatud na ang iyang giorder nga softdrinks, hilom nga gihatagan og instruction ang silbedora ug gitunol ang tibuok P1,000.
Mibalik ang silbedora ug gihatag ang sukli ngadto ni Art. “Darling, kwentaha na ning amo,” matud sa hitsuraan nga babaye nga pula na kaayo’g lipstik.
Mitutok ang silbedora kang Art, unya miduol kini sa mga babaye. “Gibayran na ang inyo.” Ingon sa miiknat ang kilay sa upat ka babaye ug nangutana kinsa ang mibayad sa ilang giorder nga pagkaon.
Gitudlo sa silbedora si Art nga mapahiyumon nga nagtutok sa mga babaye. “Gibangkahan mo nako karon miss kay akong birthday,” giingnan ni Art ang mga babaye. (Sumpayan)