May gitago ang kangitngit
Mura’g nakalitan ang hepe sa kapolisan diha nga gitug-anan ni SPO1 Nicko Bernal nga may babaye nga nanawag kaniya ug gituohan niya nga sakop kini sa kulto nga Bangkulis.
“Ngano nga nakasulti ka man niana Nicko?” sukit ni Chief Inspector Dindo Raval.
“Kuan sir, tungod kay miingon ang babaye kanako nga dili kuno nato malumpag ang puwersa sa ilang kulto,” ni Nicko.
“U-unsa?” mura’g nakalitan ang hepe. “Natiman-an ba nimo ang iyang number? Aw, sa landline ba siya nanawag o sa cellphone?”
“Sa cellphone nako nanawag ang babaye sir ug akong gi-save ang iyang numero,”
“Maayo hinuon,” matud sa hepe. “Kay basin makatabang kanato kanang maong numero sa pagtultol sa ilang nahimutangan. Pero yuna pa...”
“Nga-ngano, sir?” ni Nicko nga mikunot ang agtang.
“Giunsa man niya pagkasayod sa imong cellphone number?” mipadayag og kahibulong ang hepe.
“Tuod no?” ni Nicko pa nga karon pa makaamgo. “Ngano man tuod nga nasayod man siya sa numero sa akong cellphone?”
Nakapanghupaw ang hepe. Unya nagpanglingo.
“Usa lang ang pasabot niining tanan, Nicko. Timailhan kini nga lawom kaayo’g intelehensiya ang maong kulto,” sa hepe pa. -Sumpayan
- Latest
