Antingan si Lolo Tobal

Tulo na ka adlaw nga naglisod na sa pagginhawa si Lolo Tobal. Kumplikado sa agay-ay sa katigulangon ang iyang sakit sa edad nga 80.

Nagpinal na si Lolo Tobal. Gipiyong na niya ang iyang mga mata. Sa tulo na ka adlaw nga pagpinal ni Lolo Tobal, kanunay niya nga giwarawara ang tuo niyang kamot nga may gikumkom.

Apan sa tanan niyang mga anak, mga apo ug mga paryente, wa’y nangahas sa pagdawat sa nagwarawara nga tuo nga kamot sa himalatyon na nga tigulang.

Nabaniog man gud sa tibuok baryo nga usa ka antingan si Lolo Tobal, nga may orasyon. Gitugahan siya’g usa ka libreta panahon sa iyang kabatan-on ug nakalampos sa gitahas kaniya.

Si Lolo Tobal mihigda og usa ka semana sulod sa menteryo, usa ka semana nga paghigda sulod sa simbahan ug usa ka semana nga paghigda sulod sa usa ka langob ug kini atol g’yud sa kagabhion.

Namatud-an nga antingan gayud si Lolo Tobal kay siya gani ang mouwang kun adunay mag-away nga magtinigbasay ug magdinunggabay ug labihang kusgana.

Siya ang mopitol kun adunay maghuramentado sa baryo ug namatud-an nga kublan si Lolo Tobal kay daghan na nga higayon nga gitigbas ug gipusil siya, apan dili g’yud madutlan.

Sa tanang nag-apong sa nagpinal nga tigulang, wa g’yuy nangahas sa pagdawat sa padayong nagwarawara nga tuong kamot ni Lolo Tobal.

“Sus, kuyaw man gud nga modawat sa ibilin nga abilidad ni Lolo Tobal, unya dili makatuman sa tahas kay segurado man g’yud nga malisoan sa pangisip...!”

“Maayo unta kun may kursonada nga modawat sa ibilin ni Lolo Tobal aron dili na tawon siya mag-antos sa pagpinal ug motaliwan na siya nga malinawon...!”

Wala na makaantos si Norman, ang ulitawo nga apo ni Lolo Tobal. Giduol niya ang nagpinal nga tigulang og gidawat ang nagwarawara nga tuong kamot ni Lolo Tobal nga may gikumkom sa palad.

Human madawat ni Norman ang gamay’ng papel nga linikit, nabugtoan dayon sa gininhawa si Lolo Tobal. Giukban dayon ni Norman ang linikit nga papel sa pagtuo nga linatin nga orasyon ang nahisulat niini.

Nahingangha si Norman. Numero 762 ang nalista sa linikit nga papel. Ang mentin diay nga numero ni Lolo Tobal sa swertres lotto nga dako na siya’g pilde ug ipapadayon sa pagpamentin sa iyang binlan niini! (Kataposan)