Pista sa bukid

Gula 22

Gianod gayud sila si Kenn ug Lyn sa makusog nga sulog sa ilang mga pagbati tungod sa mainiton nila nga pagparayganay.

Gisaw-an nila ang kalipay’ng hilabihan samtang gihabolan sila sa katugnaw tungod sa gabon nga mihakop sa ilang nahimutangan.

‘I love you Lyn, I love you,” hagawhaw ni Kenn ngadto ni Lyn samtang padayon nga giangkon ni Kenn ang maanyag nga siyudadnong dalaga. Dili matukib sa pulong ang kalipay nga gibati ni Kenn tungod kay naangkon na niya si Lyn. Wala gayud siya magtuo nga moabot kining mao nga higayon.

Gusto ni Kenn nga kun mahimo pa lang unta, iyang pugngan ang pagsibog sa panahon, aron dili moabot ang kabuntagon ug pabilin niya’ng madimdim ang katam-is ni Lyn.

“Dili g’yud nako makalimtan kining nahitabo kanato Kenn dinhi sa inyong baryo atol niining among pagpamista sa bukid,” giingnan ni Lyn si Kenn human sa ilang pagparayganay.

“Ako unta’ng gusto Lyn nga dili ka na mabuwag pa nako. Kun mosugot ka, pakaslan tika Lyn,” matud ni Kenn nga migakos pag-ayo sa dalaga.

Wala dayon makatingog si Lyn sa gisulti ni Kenn. Wala siya magtuo nga seryoso ang ulitawo sa iyang gisulti. “Imo ba ko nga gikomedyahan Kenn?”nakapangutana si Lyn.

“Wala ko magbinuang kanimo Lyn, seryoso ko sa akong gisulti nga mangasawa ko nimo aron dili ka na g’yud mabuwag pa kanako,” matud ni Kenn. (Sumpayan)