Ang tabili sa karaang kaymito

Haskang kuyawa ni Ingtoy diha nga maoy iyang nakita ang iring nila nga banbanon nga adunay gikabugno, ug sa iyang tan-aw mura’g dili man iring ang kontra, kondili usa ka dako’ng tabili.

Nia kini sila magkumbati sa ilawom sa karaang punoan sa kaymito. Nahaatras si Ingtoy kay talagsa ra kini nga mahitabo nga ang iring gisuklan og usa ka dako’ng tabili.

Berde ang kolor sa tabili. Ug nakita ni Ingtoy nga mura’g misibog ang iring nga wala makalahutay sa kumbati. Mingiyaw ang iring ug midagan kini paingon sa ilang kusina.

Nakita pa ni Ingtoy ang dako’ng tabili nga mihinay kini’g lakaw paingon sa punoan sa karaang kaymito. Karaan na kining mao nga kaymito kay si anhing Lolo Tebong pa niya ang nagtanom niini.

Karaan na usab kining ilang balay nga maoy naangkon niya sa nagbahinay na sila sa ilang kabtangan.

“Lisud katuohan, Adang, apan ako g’yud nga nakita nga midagan ang atong iring, wa magsilbi sa dako’ng tabili,” ni Ingtoy pa ngadto sa asawa.

“Mao ba, hala ka, Ingtoy, karaan na baya na nga kaymitoha, di ba, basin og binuhi na sa nagpuyo diha,” ni Adang nga mura’g gipanlimbawtan sa iyang balhibo.

“Kada gabii ra ba, no, matag hagtok sa taknaan sa atong bungbong, may madungog ko nga magkantakanta diha, bugnaw ra ba kaayo’g tingog.”

Wala motingog si Ingtoy kay alang niya dili g’yud siya motuo og engkanto, duwende, agta ug uban pa. Pagkasunod adlaw, kalit lang milimba-limba sa kasakit sa iyang tiyan si Linoy, ang ilang anak.

Naghilak si Linoy sa kasakit. Unya, may nanuktok sa pultahan. Usa ka ambongan nga lalaki ang ilang nakita nga may gidala nga gamit sa doktor.

“Ako si Dr. Mercurio, silingan ra ta. Bansay ko sa pag-opera kay didto man ko magtuon og medisina sa America. Kun dili nako tabangon ang inyong anak, mamatay ni kay hapit na mobuto ang iyang apendisaytis.”

Ug gioperahan ni Dr. Mercurio ang bata. Taudtaod miduol kanila si Mercurio. “Luwas na siya, ug niay mga tambal paimna unya siya, kada upat ka oras...”

Nananghid si Mercurio sa magtiayon. “Kuan diay, naa ra ko magpuyo sa karaang kaymito, silingan ra ta...”

Sa paglakaw ni Mercurio, nakita ni Ingtoy nga didto g’yud ang doktor mopaingon sa karaang kaymito ug unya nakita niya nga nahimo kini nga usa ka dako’ng tabili. (Katapusan)