Pista sa bukid - Gula 19

Hapon na nga mipauli ang magbarkada gikan nga nangaligo sa dagat. Pulos sila nalingaw, ilabi na si Lyn ug Kenn.

Pagkagabii, mibalik sila sa baylehan aron sa pagtan-aw na sa kalingawan nga mao ang pagkorona sa midaog nga Queen of Heart, nga ig-agaw ra nila ni Kenn.

Gipasigarbo ni Kenn ngadto sa iyang mga barkada si Lyn. Iyang nasabot nga ang iyang mga barkada nasuya kaniya tungod kay ang usa sa mga bisita nila nga taga siyudad nahimo dayon niya nga girlfriend.

Lapas na sa tungang gabii nga mipauli ang grupo. Nagkasabot sila nga dili na lang mangatulog kay magpaabot na lang sa una nga biyahe sa bus paingon sa siyudad.

Diha nga nagsugod paghambin  og kamingaw ni Kenn bisan og wala pa gani sila magkalagyo si Lyn. “Paminaw ko Lyn, dili nako maantos ang kamingaw kanimo…mamatay tingali ako sa kamingaw,” matud ni Kenn.

Igo lang mingisi si Lyn nga milingi sa ulitawo. “Take it easy lang gud Kenn, ayaw lang kaayo palabi sa imong gibati,” matud ni Lyn nga nagpahiyom.

“Moingon ka lang niana Lyn kay aduna ka man tingali laing boyfriend didto sa siyudad, apan ako wala man g’yud, mao nga dili managsama ang atong bation,” ni Kenn nga seryoso kaayo og mga pulong.

Wala gayud kapugngi ni Kenn ang iyang gibati, gigakos niya si Lyn samtang diha sila sa kayda sa ilang balay nga nag-umbaw sa karsada. Taud-taud, nadungog na nila ang sirbato sa bus nga mobiyahe sa siyudad.

Gipasagdahan lang ni Lyn si Kenn nga migakos pag-ayo kaniya ug mipatik og hawok sa iyang lips. (Sumpayan)