May gitago ang kangitngit

Gula 49

“Ngitngit ra ba dinhing dapita, da,” ni PO1 Reuben Lebra  nga daw mabalak-on. “Ug awaaw pa gyud kaayo.”

“Di na problema,” matud ni Nicko. “Duna man bitaw tay flashlight.”

Dihadiha milihok ang tulo ka polis nga mga kauban ni Nicko. Ilang gitangtang ang mihiyos nga ligid ug giilisan og laing ligid. Si Nicko maoy naggunit sa flashlight nga giiwag ngadto sa ilang gibuhat.

Igo lang nahuman ang pag-ilis sa ligid sa sakyanan, kalit lang may nabati silang kagahob ug yagubyob dili layo sa ilang nahimutangan. Ang yagubyob didto maggikan sa taliwala sa bagang kakahoyan.

Wala madugay, nakalantaw sila si SPO1 Nicko Bernal ug mga kauban og kahayag didto sa ubos nga bahin sa ilang nahimutangan.

 Sa taliwala sa bagang kakahoyan nanglusot ang dan-ag sa kahayag nga daw naggikan sa daghang mga kandila nga gipangdagkotan. May bayhon sa mga tawo silang nakita.

“Unsa man kana, Sir,” nangutana si Roy.

“Ayaw pagsaba,” ni Nicko pa. “Panid-an una nato kun unsay ilang buhaton.”

“Padul-an ta sila, Sir,” sugyot ni Reuben.

“Mas maayo pa tuod,” matud ni Nicko.

Dihadiha milihok sila. Mainampingon silang miyuhot sa kakahoyan taliwala sa kangitngit. -- Sumpayan pa