Naibgan sa engkanto

Dinhi sa balangay sa San Gabriel may usa ka ambongan nga ulitawo nga gikaibgan sa kadalagahan. Anak siya sa magtiayon nga sila si Tiyas-Gunda.

Pinangga kaayo si Anatol sa iyang ginikanan kay lagi bugtong man nga anak. Kugihan si Anatol apan dili gusto ang iyang mga ginikanan nga mahago kini sa trabaho sama sa pamugha’g kahoy ug sag-ob og tubig.

Si Tiyas na lang gud ang mosag-ob og tubig didto sa tinubdan duol sa karaang kahoy nga Talisay.

Kining karaang kahoy nga Talisay, duna kuno’y mokalit og pakita nga tiguwang babaye nga puti na ang tanang buhok ug magyuko na lang nga maglakaw nga mopaingon sa tubod ug unya maligo.

“Tay, ako na lay sag-ob, uy. Dagko gud kaayo na ang balde nga imong sudla’g tubig nga imong sinangayon. Ambi nang sinangayan bi, kay ako’y moadto sa tubod,” ni Anatol nga naluoy sa iyang tatay Tiyas.

Miuyon na lang ang amahan kay moadto pa ra ba siya sa uma. Tuod, pag-abot ni Anatol sa tinubdan duol sa karaang Talisay, may nagbarog nga babaye ug nagkanta sa may kilid sa pangpang. Sa paglingi ni Anatol maoy iyang nakita ang usa ka guwapa kaayo nga babaye nga susama ra pud niya’g panuigon. Mipahiyom kini kang Anatol.

“Di ba, ikaw man si Anatol, no,” matud sa babaye nga guwapa. Ug milingkod siya sa daku’ng bato ubos sa nag-agas nga tubig. Maligo diay ang babaye.

“Dugay na man ko nga nakaila nimo ... dili ba sa gagmay pa kita anhi ka man dinhi maligo?” matud sa babaye.

Miyango si Anatol. Sa hilom naibog si Anatol sa katahom sa babaye.

“Ako si Lorelya, ang tag-iya dinhi sa tinubdan ug sa karaang kahoy nga Talisay. Bugnaw kaayo ang tubig dinhi, no? Ikaw Anatol, dili ka maligo? ... Ubani ko pagkaligo bi...”

Ug mao kadto ang sinugdanan sa pagminahalay sa duha. Ug sa ngadto-ngadto, nasayran ni Anatol nga usa diay ka engkanto si Lorelya. Miabot g’yud ang adlaw nga mikuyog si Anatol kang Lorelya didto sa ilang gingharian apan matag Biyernes mopauli siya sa ilang balay.

Daghan ang nahibulong kay kalit man lang milambo ang pagpuyo sa magtiayon nga Tiyas ug Gunda. Usa ka hapon, nananghid si Anatol nga dili na siya mouli sa ila, adto na siya motipon sa iyang minahal nga si Lorelya, ang anak sa dato nga engkanto. (Kataposan)