Pista sa bukid

Human matudloi ni Kenn si Lyn kun unsay buhaton niya aron dili siya mapiit sa mga lalaki nga mogakos kaniya sa bayle, ingon man kun mouyon ra siya nga piiton sa nakigbayle kaniya, iya dayon kini nga gipangutana.

“Unya, karon, asa man nimo ipahiluna ang imong kamot sa akong pakigbayle kanimo?” gisukna ni Kenn ang dalaga samtang mahinangpon siya nga nagpaabot.

Mipahiyom si Lyn nga mitutok kang Kenn ug anam-anam niya nga gipahiluna ang duha niya ka bukton ibabaw sa abaga sa ulitawo. Nagpasabot kini nga dili siya supak nga piiton sa paggakus ni Kenn.

Tuod, gianam-anam usab ni Kenn sa pagpaduol ang lawas ni Lyn ngadto sa iyang dughan. “Yehey! Ka sweet sa duha!” halos magkadungan pagsinggit sila si Clemen ug Alice nga nagsayaw usab diha sa ilang tupad.

“Angayan kaayo mo day ug ang akong manghud, pareson g’yud kaayo mo,” matud ni Nympha nga maguwang ni Kenn. Pareho sila si Kenn ug Lyn nga mipahiyom.

 Nahinangop sa hilom si Kenn. Gibatyag niya ang pagbag-id panagsa sa duha ka tuybo nga bahin sa dughan ni Lyn ngadto sa iyang dughan. Hapit na lang nagpauraray si Lyn sa abaga ni Ken dungan sa mananoy nga tugtog sa Please Love Me Now.

Unya, napupos na ang tugtog. “Adto lang ta sa gawas sa baylehan Kenn kay dili ko mosayaw sa uban,” matud sa dalaga. (Sumpayan)