Kalag sa gipatay’ng gerilya

Sa atbang sa ilang balay ni Estong adunay usa ka daku’ng punoan sa kahoy’ng Mulbolan nga matud pa may nahitabo ning maong kahoy kaniadto.

Dugay na kay panahon pa man kadto sa ikaduhang gubat sa kalibutan nga mitakas dinhi sa atong kapupud-an ang mga sundalo nga Hapon.

Matud pa nga dunay gibitay sa mga sundalo nga Hapon ilawom sa daku’ng punoan sa Mulbolan.

Sa wala pa bitaya ang maong gerilya, gilaplapan kuno sa mga Hapon ang lapalapa niini ug gibutanga’g abo. Hilabihan kuno nga nakasinggit sa maong gerilya nga sundalo nga nadakpan sa mga Hapon.

“Ayaaaayyyy, magbayad mo niining inyong gibuhat nako mga pikota mooo, mga pikotttt, mga hayopppp! Aahhhhh....!”

Dayon may usa ka opisyal sa sundalo’ng Hapon nga miibot sa iyang bayonita ug gipunggotan ang ginapos nga gerilya. Mao kini nga hangtud karon dunay madunggan nga magdaghong ilawom sa karaang punoan sa Mulbolan.

“Estong, di ka pa matulog?”matud sa inahan nga si Sabel nga misangpit kaniya kay halawom na ang kagabhion.

“Eksam namo ugma, Nay,” tubag ni Estong ngadto sa inahan.

“Na, hala, pero, kanang lampara, sindihi lang unya na’g gas basin og mahutdan,” tingog sa inahan nga mura’g nagduka na. Wala pa man gud makaabot dinhi sa ilang balangay ang kuryente, kay nia man sa ibabaw sa bukid ang pinuy-anan ni Estong.

Samtang nagpadayon sa pagtuon si Estong may mituktok sa pultahan ug ang lampara ingon sa miawop-awop. Kinsa may nanuktok nga tungang gabii na man ug si tatay niya Damian tua pa man sa iyang trabaho sa siyudad.

Nagduka nga miduol si Estong sa pultahan ug iyang giablehan. Ug sa iyang pag-abli maoy mibantang sa iyang panan-aw ang usa ka tawo nga samaran, nagkadugo.

“Dooooo, gusto ko...nga magkuha ka’g pari, ugma g’yud, aron magmalinawon ang akong kalag. Pamisahe ug pabenditahi sa pari kining dapita, ug importante ang sa ilawom sa Mulbolan diin ako patya ug paantosa sa mga Hapon.” Ug kalit lang nahanaw ang nagkadugo nga tawo. Pagka ugma gisugid ni Estong kang Nanay niya ang iyang nasaksihan kagabii.

Pagka sunod semana may pari na nga miabot aron misahan ug benditahan ang ilawom sa karaang kahoy’ng Mulbolan.

Mialibwag sa palibot sa Mulbolan ang baho sa kamanyan. (Katapusan)