Pista sa bukid

Pag-abot sa tulo ka dalaga’ng siyudadnon didto sa baylehan, giabi-abi sila sa tigpasiugda sa kalingawan apil na si Nympha nga maguwang ni Kenn.

Gipalingkod sila sa naglinya nga lingkoranang plastik. Si Kenn nagtindog sa luyo sa mga dalaga samtang nagpaabot sa pagsugod na sa kalingawan. “Uy, Kenn, kinahanglan nga ikaw g’yud ang mouna pakigsayaw ni Lyn ha? Kinahanglan nga ikaw ang una nga makagakus niya,” matud sa komedyante nga si Clemen.

Gipasidan-an sila ni Nympha nga walay balibaray sa mga babaye basta makasugod na’g sayaw. Tungod niini, mihana og tindog si Lyn pagkasayod nga banus-banosan diay sila og sayaw sa mga lalaki.

Nakabantay si Kenn nga ang mga mata sa mga ulitawo walay hunong sa pagtutok sa ilang mga dalaga’ng bisita.

Gani, may pipila na ka ulitawo nga miduol kang Kenn ug nagpadungog-dungog nga gusto sila nga makighigala sa mga dalaga nga gikan sa siyudad. Milingi si Lyn ngadto kang Kenn nga diha magtindog sa iyang likud.

“Kenn, dili lang ko molingkod diri uy kay dili ko mosayaw,” matud ni Lyn. Nananghid si Lyn sa iyang mga kauban nga dili na lang molingkod aron dili mahinayak ang mga lalaki sa pakigsayaw kaniya unya iya ra nga mabalibaran.

“Sige Kenn, ayaw mo pagbuwag si Lyn ha?” giingnan si Kenn sa iyang maguwang nga babaye. Nakapahiyom si Lyn nga nagsud-ong sa mga babaye’g lalaki nga naggaksanay pagsayaw. (Sumpayan)