May gitago ang kangitngit

Human sa pagsukit-sukit ni SPO1 Nicko Bernal sa mga ginikanan sa bata nga gipatay didto sa Barangay Lawis, namauli na ang magtiayon.

“I-finalize ninyo kanang cartographic sketch,” mando ni Nicko ngadto nila ni PO1 Rudy Alarcon ug Reuben Lebra.

Anad na kaayo sila niining buhata paghimo og cartographic sketch base sa ihulagway sa mga saksi. Basta may mga kaso nga ang suspek wala mailhi, sila gayud ang mohimo og cartographic sketch.

Hapon na diha nga nahuman nila ang hulagway.

“Pagpakopya kamo’g daghan nianang mao nga mga hulagway kay ikatag nato sa lainlaing dapit aron makatabang ang mga tawo sa pag-ila sa mga suspek,” matud ni Nicko. Tuod man, pagka-ugma, gipakatap gayud nila ang hulagway sa tulo ka sakop sa Bangkulis Black Brotherhood sa tanang kabarangayan sa lungsod sa Tinago.

Gibutang ug gipapilit nila ang maong mga hulagway sa barangay hall, mga waiting shed, mga poste sa elektrisidad ug sa mga dapit nga tapokanan sa daghang mga tawo. Gituyo nila kini aron gayud masayod ang tanan.

Niana nga pagkagabii, human makapanihapon ang banay ni Nicko, may sakyanan nga kalit mihunong sa tungod sa ilang balay. Girakrakan ang ilang balay sa mga armadong tawo nga nagsakay niini. (Sumpayan)