Buwisit nga balay

Mamalhin na lang ta’g puyo. Mura ma’g buwisit ning lawaka!” giingnan ni Tinang ang iyang bana nga si Rolly.

Upat ka buwan pa lang sila dinhi apan nagpuli-puli lang sila’g kasakit. Sige nga gihubak si Tinang. Nagtupad sila’g lingkod sa sopa ni’ng Domingo sa buntag. “Kun di ka komportable dinhi, mamalhin ta’g puyo,” ni Rolly.

Nakauyon unta si Rolly sa lawak nga ilang giabangan kay adunay dako nga parkingan ug safety ang ilang sakyanan kay may kural man nga hollow blocks.

Apan sa pongsoy pa, daghang negative energy. Una, ngiob ang lawak nga mura’g langub nga anaa sa ground floor sa karaang dos andanas nga balay.

Nag-atubang sa kasadpan ang gate buyon sa Bataan Street. Gilibotan og dagku’ng bilding sa silangan, amihan ug habagatan. May mga kanal sa palibot nga may nagluoy nga tubig.

May mga iro nga gitangkal duol sa lawak. Way atiman ang tangkal ug ang mga iro. Nangalisbo ang baho sa mga iro nga usahay mosulod sa lawak.

Ang balay gipanag-iya sa magtiayong Marita ug Albert ug giabangan nila’g P6,000 ang buwan. Gipangayoan sila’g usa ka bulan nga deposito ug duha ka bulan nga advance.

Nakaingon sila nga buwisit ang balay kay ang magtiayon wa’y maayo nga relasyon, mag-iyahay lang og lakaw. Nanabi nila ang maid sa magtiayon nga may babaye ang bana ug may kabit ang asawa.

Ang laing tulo ka nangabang sa balay sa magtiayon mga kwestiyonable ‘sab og mga lihok. Ang duha ka babaye mura’g dalaga apan may magkuha-kuha magabii nga lalaki.

Ang usa ka lalaki nga nag-abang, modawat og mga bisita nga lalaki nga mura’g bading. Ang maid utro ‘sab kay may lalaki nga tagoan sa iyang lawak ini’g pamisita.

“Lo! La! Di na diay ta mamuyo dinhi?” matud sa 8-anyos nga apo nila ni Rolly ug Tinang. Nakadungog diay ang bata sa gipanagsultihan sa mga apohan samtang siya naligo sa banyo.

“O Inday kay buwisit ning atong lawak. Kanunay mi masakit sa imong lola,” giingnan ni Rolly ang apo.

“Bahala na’g mamalhin ta basta di lang sa probinsiya kay di ko ganahan moeskuyla sa probinsiya, Lo” matud sa apo nga si Fe. (Kataposan)