Bilyako nga polis

Gula 13

Mitutok kang Elmer ang duha ka tawo nga bagsikon ang bayhon.

Naminaw lang usa sila samtang giayo’g kasaba ni Fatima si Elmer. Apan pagkataud-taud, ang usa sa duha ka tawo nagpakisayod na kun unsay nahitabo.

“Abusado kaayo kini’ng maong polis. Gipangayoan mi niya og two hundred thousand kay aron kuno makapiyansa sila si papa ug mama nga ilang gidakop apan dili diay tinuod. Wala pa g’yud matagbaw…” wala makatiwas si Fatima sa buot niya nga isulti kay nakahilak siya.

Mingislo ang nawong sa duha ka tawo nga mitutok kang Elmer. “Polis ka diay bai? Gipangwarta nimo sila si Victor? Unya unsa pa’y pangabuso nga gihimo niya nimo day Fat?” gipangutana sa bagsik nga lalaki ang dalaga.      

Gikulbaan na si Elmer sa iyang kahimtang kay nagsugod na sa pagpundok ang mga tawo. Nagdali unta siya pagbiya sa mao nga dapit apan gihasmagan siya sa bagsik nga lalaki ug gigunitan.

Mitabang ang laing lalaki ug giilogan si Elmer sa iyang armas. Misukol si Elmer apan abtik kaayo ang bagsikon nga lalaki nga nakapusil kaniya.

Adunay nangabot nga kapolisan apan walay bisan usa nga mitug-an kun kinsa ang nagpatay kang Elmer. Gisukit-sukit si Fatima sa opisyal sa mga polis apan namalibad siya nga wala makaila sa mipusil ni Elmer.

Alang kang Fatima, nakabawos na siya sa abusado nga polis nga mibuong sa iyang kadungganan. Gitawgan si Fatima sa opisyal sa kapolisan nga may nakuha sila nga kuwarta sa bulsa ni Elmer nga P135 mil ug ila kini nga iuli sa dalaga. (Kataposan)