May gitago ang kangitngit - Gula 30

Nakahinuktok si SPO1 Nicko Bernal. Karon pa lang siya nakaamgo nga dili diay masayon-sayon ang mga tawo nga buot niya nga dakpon ug taralon sa hukmanan tungod sa pagpatay sa mga bata.

Giuli ni Chief Inspector Dindo Raval ang libro nga itom ang hapin ngadto ni Nicko. Gusto usab ni Nicko nga basahon pag-ayo ang mao nga libro aron masayran niya ang giingon sa hepe nga doktrina sa Bangkulis Black Brotherhood.

Kini mao ang kulto nga gidudahang utok sa pagpatay sa tulo na ka bata sa lungsod sa Tinago nga pulos natawo sa Septiyembre 8.

Human sa panagsulti nila ni Nicko ug sa hepe milahos siya sa iyang opisina. Miirag siya sa iyang lingkoranan. Gisugdan dayon niya’g pakli ang basahon nga itom ang hapin.

Mipadayon si Nicko pagpakli sa mga panid sa libro. Iyang gipangita kadtong bahin sa pagtulon-an sa kulto nga si Maria magpakatawo pag-usab dinhi sa kalibutan aron sa ikaduha nga higayon manginahan ni Jesus.

Nakaplagan ni Nicko ang maong artikulo sa doktrina. Nagsugod kini sa panid 66. Taas ang maong artikulo nga naglatid sa doktrina sa kulto sa mga anti-Kristo.

Apan adunay mahinungdanon nga bahin sa doktrina nga nakahatag sa pagtagad ni Nicko. — Sumpayan