May gitago ang kangitngit
Gihinuktokan ni SPO1 Nicko Bernal ang tanang gisulti sa ilang hepe kabahin sa giingon nga kulto nga Bangkulisan.
“Dili buot ang mga Bangkulisan nga magpakatawo pag-usab si Maria ug ingon man si Jesus. Mao nga aron pagseguro nga dili na magpakatawo si Jesus pag-usab, ilang patyon ang tanang batang babaye nga natawo sa Septiyembre 8, tungod kay base kuno sa pagtulon-an sa Simbahang Katoliko, natawo si Birhen Maria sa Septiyembre 8,” sa hepe pa.
“Dakong binuang kanang maong pagtulon-an, sir,” ni Nicko pa.
“Tinuod kana. Alang kanako, usa kini ka daku’ng binuang. Apan mao kini ang gituohan sa Bangkulis Black Brotherhood. Ang maong grupo nagtinguha nga mohari ang gahom sa kangitngit ug kadautan dinhi sa kalibotan. Mao kini ang hinungdan nga ilang patyon ang tanang bata nga babaye nga natawo sa Septiyembre 8,” matud ni Chief Inspector Dindo Raval.
“Kun mao kana, sir, kinahanglang masumpo ang maong grupo,” matud ni Nicko.
“Mao gayud kana ang husto, Nicko. Apan usa kana ka malisud nga bulohaton kay wala kita makaila kun kinsa ang mga sakop sa maong kulto. Maglisod gayud kita, Nicko,” ni Chief Inspector Raval. (Sumpayan)
- Latest
