Dili g’yud ma-discourage

Kasagaran, kun mag-abot ang mga abogado sulod sa husgado, unya wa pa magsugod ang bista, magtabi dayon.

Mobaho man kuno ang baba sa abogado kun dili katabi. Ning buntaga, pagsulod ni Atty. Ben Agas, saba na ang husgado kay diha na sila si Atty. Rey Ferno, Atty. Leo Unlan, Court interpreter Nestor Kalas ug stenographer Ernie Renda.

Nagkinataw-anay sila. Ang ilang gihisgutan, mga abogado nga kadaghan nahagbong sa bar, apan naabogado g’yud. May kapito nikuha, kawalo ug kasiyam.

Ang uban kuno dili mosulti sa tinuod. May moingon, kaduha o katulo lang mi-bar bisan ang tinuod sobra na sa kalima.  

“Dili importante nga mahagbong kadaghan. Ang importante nga nakapasar g’yud ka. Failure is not defeat until you stop trying,” ni Ben nga nisalga sa estorya.

“Ikaw Ben, kapila ka nahagbong sa bar?” ni Rey. “Kalooy sa Diyos, kausa ra g’yud. Apan kataw-anan kaayo ning akong kaagi,” ni Ben nga nagpahiyom.

“Ngano man?” ni Leo. Nahilom sila kay gusto nga maminaw sa kaagi ni Ben. “Ang akong gitagana para nako, tulo ra g’yud ka higayon sa pag-bar. Kun mahagbong ko’g katulo, di na ko mangambisyon nga maabogado pa,” ni Ben.

“Mao ba, attorney?” ni Nestor.

“Lima mi ka klasmet nga barkada sa law school. Ako ra ang naabogado kay gisangunan ko nila sa pagka-researcher. Ako’y mas daghang nakat-onan. Ang nakaalegre kay pag-bar namo, nagsabot mi nga pasar o dili, magpakitaay mi sa among mga ratings. Ang ako 69. Gipakita dayon nako sila. Apan sila, wa nipakita. Wa’y word of honor,” ni Ben.

“Ngano man?” ni Ernie. “Fifty plus ra tingale ang ilang ratings. Pero positive thinking man ko. Ang 69, six points na lang ang kulang para ma-75. Pag-usab nako, niabot g’yud og 76. Naabogado g’yud tawon ko,” matud ni Ben.

Dunay nangutana ni Ben sa iyang sekreto ngano nga wala siya naluya nga wala dayon makapasar sa bar.

“I have no fear of failure. Akong mga nakadungan, lainlain lang og lihok. Kuro’g, luspad, kuyap ug uban pa. Fear of failure is number one cause of failure,” ni Ben.

Nangyango ang tanang abogado ug ang ubang naminaw nga nibilib ni Ben. Labi na sila’s Nestor ug Ernie nga pulos mga barrister. (Kataposan)