Ang hunasan sa Kinawahan

Domingo. Alas-4 pa gani sa kadlawon, sadya na kaayong nahiabot sa hunasan sa Kinawahan ang mga manginginhas nga taga sityo Kandangas, sa baryo Caduawan, Tabogon.

Layo nga panginhasan ang hunasan sa Kinawahan tungod kay nahisakop kini sa lungsod sa San Remigio. Ang mga manginginhas mag-antos sa paglakaw sa gilay-on nga 10 ka kilometro, gikan sa Kandangas paingon sa Kinawahan.

Ako, nga nag-edad na og 10 anyos niadtong panahona, kugihan kaayong mokuyog sa panon sa mga manginginhas. Kauban ko sila si Tatay ug Nanay, Day Celing ug Do Juan nga akong magulang uban sa among mga silingan.

Naandan namo nga magganayan mi sa pagpanginhas matag duha ka semana sa usa ka bulan sa hunasan sa Kinawahan, yawat na lang makabangkelya sa panud-an matag Domingo nga dili na moadto sa tiyanggihan.

Malingaw g’yud ko nga mouban nilang Tatay ug Nanay sa pagpanginhas nga abtik kaayo nga magsuhid sa mga lim-aw sa hunasan uban sa gibit-bit nga bukag nga sudlan sa kininhasan.

Maayo kaayo nga mokumot si Nanay sa nahabiling mga lusay sa hunasan, aron makakaplag og mga kinhason nga litob, bat ug swaki. Si Tatay ‘sab maayo kaayo nga manigmit og mga kasag ug bakasi sa mga lim-aw. Si Day Celing ug Do Juan maoy nag-atbang sa mga lungag sa tama’a nga gibutangan nila’g dinukdok nga upos sa tabako aron mogawas ang tama’a, mura’g gamay nga kugita.

Makasiyagit ‘sab ko’s kasakit kay kadaghan na ko mapaaki sa mga kasag nga kuoton nako sa ilang mga lungag.

Inig ka banagbanag na, sadya na kaayo ang tanang manginginhas nga magtandiay sa dala nilang mga bukag kun kinsa ang daghan og nakinhas.

Gana ug lami kaayong ikaon sa mga bawon sa manginginhas, sama sa puto nga bulanghoy, linung-ag saging kardaba, kamote’ng bagon ug uban pa nga mga lagutmon nga sulaan lang sa mga bat, litub, swaki, amba’ng ug mulbog.

Unya, inigka-alas-7 sa buntag nga inanay migiswid ang bidlisiw sa kabuntagon ug migimok na ang pagtaub sa dagat, namiya dayon ang tanang manginginhas sa hunasan sa Kinawahan aron mopauli na sa Kandangas.

Karon, nga ania na ko magpuyo sa magahob nga dakbayan uban sa akong asawa ug mga anak, igo na lang ako sa paghandom sa hunasan sa Kinawahan.

Sadya ug makalingaw ang pagpanginhas sa mga kabus sa hunasan. Alang kanako, ang lahutay sa pagpakigbisog aron mabuhi dinhi sa magahob nga dakbayan, usa gihapon ka matang sa pagpanginhas. (Kataposan)