Pagpaubos dalaygon

Dear Tita Salie,

Tagoa lang ko sa ngalan nga Nowie, 25 years of age. Duha ra mi ka managsuon ug maguwang ko. Kanunay man gud ko nga awayon sa akong manghud nga lalaki. Wa’y adlaw nga dili kami maglalis. Tambagan ko kanunay sa among parents nga magpaubos o pasensiyahan na lang nako kay kuno maguwang ko. Ngano’ng lisod man kaayo magpaubos? Pasabta ko.

Dear Nowie,

Usahay ang problema sa managsuon sama kini’g hubag diin ang imong gitambalan mao lang ang diha sa ibabaw ug wala tambali kun unsa’y hinungdan sa imong hubag. Susama niini ang panag-away sa mga magsuon nga duna gayu’y nagpahipi nga hinungdan. Sama sa hubag, kun sigehan lang ni nimo og pislit mokupos man apan mosamot pa kini. Ang maayo nga himuon nimo kay ikaw man maoy maguwang sutaa kun unsa gayu’y hinungdan sa problema nga magsige man kamo og away. Sa ingon nga paagi imong mapangitaan og solusyon ang hinungdan sa problema. Ang pagsusi kun unsa gayu’y problema ninyo sa imong igsuon maoy bahin lang sa maong solusyon. Ang imong pagpaubos imong magamit pinaagi sa pagsusi. – Tita Salie