Itugyan ta ang tanan

Uban sa mga kaubanan nilang miyembro sa usa ka relihiyusong kapunongan, malipayon nga nahiapil ang magtiayong Rico ug Nena sa gipahigayong tinuig nga tulumanon sa Viacrusis didto sa Mount Tabor, Talamban, siyudad sa Sugbo, agi’g pagpamalandong sa pag-antos ug pagpasakit ni Hesukristo sa iyang pagpalansang ug pagkamatay sa krus didto sa Kalbaryo, atol sa kasaulogan sa Biyernes Santo.

Nagsugod ang tulumanon sa Viacrusis sa alas-8 sa buntag ug mitunga ang relihiyusong grupo didto sa kinaibabwan, lahos sa katapusang estasyon sa krus sa pagpasakit sa atong Ginoo. Ug natapos ang tulumanon sa Viacrusis sa pagka-alas-11 sa buntag.

Ang relihiyusong kapunongan naglangkob sa couples cluster, youth cluster, single adult men cluster ug single adult women cluster. Isip magtiayon, nahisakop sila si Rico ug Nena sa couples cluster.

Hilabihang sadyaa sa grupo nga nagdungan og pangaon sa dala nilang mga bawon, alang sa ilang paniudto. Midistansya sila si Rico ug Nena sa ilang kaubanan human sa ilang paniudto ug nanglingkod ang magtiayon sa nag-igdal nga gamot sa dakong punoan sa mahogany.  Namatikdan sa magtiayon nga nag-iyahay na paglugsong ang ilang kaubanan sa ubos aron mamauli na. Wala nila baliha ni Rico ug Nena ang kainit nga gidulot sa kaudtohon sa Biyernes Santo samtang padayon nga nagtupad og lingkod sa igdal nga gamot sa kahoy didto sa ibabaw nga bahin.“Sukad ta nagpasakop sa relihiyusong kapunongan, Nen, inanay tang nahiusa sa Ginoo...!” “Bitaw, Ric! Inanay tang nahimong renewed persons...!”

“Bisan sa daghang problema ug pagsulay sa atong kinabuhi uban sa atong mga anak nakalahutay gihapon ta, Nen...!” 

“Pasalamat ta’s Ginoo nga buotan sab ang atong upat ka mga anak nga pulos na may maayong trabaho, Ric...!”

“Itugyan ta ang tanan sa Ginoo, Nen, uban sa dakong pagsalig Niya!”

“Oo, Ric! Itugyan ta ang tanan sa Ginoo! Puy-an ta ang iyang pulong sa atong kasingkasing ug nuntan nato sa buhat.

“Mosunod gyud diay ta’s kabubut-on sa Ginoo, Nen! Itugyan ta ang tanan Kaniya, kay Siya lang ang nasayod sa tanan natong gikinahanglan...!

“Mao nga ning adlaw sa Biyernes Santo, Ric, angay lang gyud nato pamalandongan ang pag-antos, pagpalansang ug pagpakamatay sa atong Ginoong Hesus sa krus...!”

“Lagsik nga nanglugsong paingon sa ubos sila si Rico ug Nena aron pag-agpas sa ilang mga kauban. Nabatyagan na usab sa magtiayon ang kagaan sa pamatyag sa ilang lawas, nga kanunay nilang masinati inigkahuman sa tulumanon sa Via-crusis matag Biyernes Santo. Ug misamot kabug-os ang panaad sa magtiayon nga itugyan nila ang tanan sa ilang kinabuhi ngadto sa Ginoo. (Kataposan)