Pirmi kulatahon

Dear Tita Salie,

Have a nice day. Abi mo, ganahan kaayo ko mobasa niini’ng imong lindog. Tagoa lang ko sa ngalan nga Ms. Catherine, 28 years of age. My problem is kun mag-away gani mi sa akong ka-live in partner, iya man dayon ko’ng kulatahon. Maayo kaha nga ako na lang siya nga bulagan? Palihug pasabta ko kun unsa’y akong buhaton?

* * *

Good day Ms. Catherine,

Ang pagpangulata maoy usa ka buhat nga dugay na’ng gidili sa Diyos ug dili gayud niya kini uyonan. Kini maoy sama og pagpasipala sa iyang hiyas nga gugma. Gilatid niya sa iyang balaang Pulong, ang Bibliya, nga ipasundayag gayud ang pagkaaghop. Sultihi siya, Ms. Catherine, uban ang malumo nga paagi ug respeto aron sa kadugayan iya kini’ng maamgohan. Pasakitan ba diay sa usa ka tawo ang butang nga iyang gimahal? Dili ba diay niya kini ampingan? Kini maoy isukna kaniya. Dili makasulbad ang panagbulag, hinuon, paningkamoti ninyo nga ma-legal ang inyong relasyon karon. Ayaw pagdali-dali sa desisyon. Himoa nga ikaw usa ka babaye’ng maalamon. Ang Bibliya nagaingon “Ang babaye’ng tinuod nga maalamon nagtukod sa iyang balay, apan ang buang-buang naglumpag niana pinaagi sa iyang kamot.” - Tita Salie