Halandumon nga Sugat - Gula 2

Gisugdan na g’yud ang pasundayag sa Sugat sa Pagkabanhaw sa lungsod sa Minglanilla. Gitawag kini og Kabanhawan Festival ug gigastohan g’yud sa lungsod aron mahimo kini nga mabulokon.

Gipasiklapan ni Gerald ang babaye nga diha sa iyang ubos. Natagbaw intawon sa pagkinto aron lang g’yud makakita sa pasundayag kay nasalipdan siya sa bagang duot sa mga tawo.

Nanaog si Gerald gikan sa iyang gitungtongan. “Miss, ikaw puli sa akong gitindogan nga bangko’ng semento aron makakita ka g’yud sa pasundayag,” giingnan ni Gerald ang babaye.

“Sure ka? Salamat kaayo ha?” matud sa babaye nga nagpahiyom. Gitabangan pa ni Gerald ang babaye nga dili kini maglisod sa pagsaka sa sementado’ng lingkoranan.

Mapahiyumon kaayo ang babaye diha nga nakatungtong na siya sa lingkoranan nga semento. “Puwede ka ra man makatungtong gihapon, dali,” agda sa babaye kang Gerald.

Tuod mikatkat si Gerald kay maglisud man ‘sab g’yud siya pagtan-aw kun tua siya sa ubos. Nakalingi kang Gerald ang iyang ig-agaw nga si Ruben ug nakabantay nga may gikaestorya na kini nga babaye.

“Gaw, dalia ra gud nimo nakaamiga, gilupig ko nimo gaw da,” matud ni Ruben nga milingi kadiyot sa iyang ig-agaw nga nagngisi. Gibawsan ra og pahiyom ni Gerald ang iyang agaw.

Samtang nagtan-aw sa pasundayag sa Sugat, nagsige ‘sab og sultihanay sila si Gerald ug ang babaye. “Yuna kaganina ra ta nga nagsige’g sultihanay pero wala ta magkailhanay,” giingnan ni Gerald ang babaye.

Milingi kini kaniya nga nagpahiyom. “Ako si Daisy, tawga lang ko’g Inday” dali nga tubag sa babaye. Nagpaila si Gerald ug mitug-an nga una pa niya kini nga pagtambong sa sugat sa Minglanilla.

Nangalimyon ang kahumot ni Daisy. (Sumpayan)