Pagpasaylo

Ning panahon sa Kuwaresma, mahinumduman nato ang pagpasaylo. Kay nabungat ni Kristo samtang gidagmalan siya sa mga Hudeyo nga “Pasayloa sila kay wa sila masayod sa ilang gibuhat”.

Sayon ni tumanon. Apan kun ang nakasala nasayod sa dautan niyang gibuhat, makapasaylo ba kaha ka? Ang tubag niini naa sa pangadyeon nga “Amahan Namo.”

Sa mga nakat-onan nako sa pagbinasa og Bibliya, nipilit sa akong panumduman ang kaagi sa kaluha nga sila si Esau ug Jacob, mga anak ni Isaac ug Rebecca, ug mga apo ni Abraham. Ang akong mga higala nakasabot nga gitikasan ni Jacob si Esau sa iyang katungod isip unang anak lalaki (first-born son).

Sa mga tawo sa Bibliya, ang panganay nga lalaki may pinakadakong mapanunod sa ginikanan ikompara sa iyang mga igsoon. Sa sugilanon sa Bibliya, gipasibat ni Rebecca si Jacob kay gibaharan nga patyon ni Esau nga naglagot pag-ayo sa iyang kaluha.

Sobra 14 anyos nga wa sila nagkita. Pagkita nila’g usab, nagkurog sa kahadlok si Jacob. Apan si Esau, mapahiyumon ug malipayon nga nakita niya ang iyang kaluha. Tataw nga nahanaw na ang iyang pagdumot ug gipasaylo na niya si Jacob. Gani, kanang pulong nato nga “hakog” gikan na sa ngalan nga Jacob. Kay nagtoo ta nga dawo ug tikasan si Jacob ug gikawatan sa katungod ang iyang kaluha nga si Esau.

Sa akong banabana, namalandong si Esau sulod sa 14 ka tuig. Nakaamgo siya nga wa diay siya tikasi ni Jacob. Gibaligya ni Esau ang iyang katungod ngadto ni Jacob. Gibaylo niya sa lamian nga pagkaon. Busa way kapasikaran ang iyang kalagot sa igsoon. (Genesis 25:29:34) (Katapusan)