Wa na ganahi

Dear Tita Salie,

Have a nice day. I’m Ofella, 22, duna ko’y duha ka anak. Naglibog man gud ko karon kay kini’ng akong kaipon bati kaayo’g batasan. Nawala na g’yud ang akong love niya.  Five years na mi nga nag-ipon ug ultimo pagsimba gidid-an ko, selpon bawal ‘sab. Dili na kuno kinahanglan mag- selpon ko kay naa ra man ko’s balay. Wala na ko ganahi sa akong kahimtang. Palihug pasabta ko, Tita Salie, sa angay kong buhaton.

* * *

Good day Ofella,

Sa atong mga adlaw daghan na ang nag-ipon sa pagpuyo isip bana ug asawa nga walay bisan unsa’ng legal nga kapangakohan. Hinumdomi nga ang balaod sa tawo ug sa Diyos nag-awhag sa pagparehestro sa kaminyoon. Kini ang una’ng lakang alang sa pagbaton og kalinaw. Ug ang legal nga kaminyoon makatabang kini kun mausab ang dagan sa inyong panag-ipon. Ug dinhi sa imong kahimtang duna kay kagawasan sa paghimo’g desisyon. Hunahunaa usab ang inyong mga anak. Usa sa maayo’ng paagi sa pagbaton og kalinaw mao ang kanunay nga komunikasyon. Estoryahan ninyo ang matag usa ka problema nga motungha ug iampo kini sa Diyos kay ang kasulatan (Isaias 48:17) nagaingon: “Ako si Jehova, mao ang imong Diyos, ang nagtudlo kanimo aron ikaw makabaton og kaayohan, ang usa nga nagpalakaw kanimo sa dalan nga angay mong pagalaktan.” -- Tita Salie