Panumpa nga bakak

Nalipay si Jeffrey nga misugot ang iyang amigo nga mipahuwam kaniya’g Mitsubishi Strada nga makagamit gihapon sa sakyanan ug ugma na lang ipauli.

Human makailis si Jeffrey, nagdali siya nga miadto sa sakyanan. Misirit lang si Jeffrey paingon sa gipuy-an ni Janeth. Nakaagi si Jeffrey og gasoline station. Iya’ng gipa-full tank ang sakyanan.

Lapas na sa alas singko sa hapon nga miabot si Jeffrey sa gipuy-an ni Janet didto sa Barangay Labangon. Miserbato si Jeffrey sa sakyanan. Taud-taud, miabli ang pultahan ug migawas si Janeth nga nakailis na diay’ng daan.

Nakapanglad-ok sa laway si Jeffrey nga nagsud-ong kang Janeth samtang kini naglakaw paingon sa iyang nahimutangan. Nag-short pants lang si Janeth ug nag-amag ang puti kaayo’ng mga paa sa dalaga.

Angayan usab kini kaayo sa gisul-ob niini nga branded nga T-shirt nga green. “Nag-andam na ko daan Jeff. Pero kun wala ka pa muabot, molakaw gihapon ko kay adto ko sa akong amiga nga nag-celebrate sa iyang pag-graduate sa kurso nga education,” matud ni Janeth.

“Nalipay bitaw kaayo ko nga ready ka na diay. Mangaon usa ta kay gutom kaayo Neth,” giingnan ni Jeffrey si Janeth. “Ikaw ang bahala kay you’re my boss karon,” dali nga tubag sa dalaga.

Didto gidala ni Jeffrey si Janeth sa usa ka ilado kaayo’ng kan-anan sa Archbishop Reyes Avenue aron adto sila mag-dinner.

Plano ni Jeffrey nga human sila mag-dinner, hangyuon na niya si Janeth nga mosulod sila sa mabugnaw nga lawak.

Samtang nagpaabot sa ilang gi-order. “Asa ta gikan dinhi Jeff?” nangutana si Janeth sa ulitawo. Wala dayon makatingog si Jeffrey, ingon sa gibati og kauwaw.

Taud-taud. “Puwede ba og manulod ta og motel Neth?” ingon sa nagkurog ang tingog ni Jeffrey nga nagpaabot kun unsay tubag sa dalaga. (Sumpayan)