Titulado

Malipayon samtang mapasigarbuhon kaayo nga midawat sa iyang diploma si Noel, usa siya sa gatusan ka mga magtutungha nga nigraduwar karong hapona dinhi sa St. Peter College lungsod sa Balingasag, Misamis Oriental.

Sangko sa langit ang iyang kalipay nga gibati ni Noel kay sa katapusan naabot na gyud niya ang kurso nga dugay na niyang gipangandoy, ang mahimong usa ka magtutudlo.

“Akong pahalipay anak,” ni nanay niya Celia nga maoy nitambong sa pagpaso ni Noel.

“Salamat nanay Celia, utang ko kaninyo ni tatay Roman ang akung kalampusan,” tubag ni Noel sa iyang inahan.

Wala makatambong sa graduation ni Noel si tatay niya Roman, kay didto kini sa bukid siya ang nag-atiman sa umahan nga maoy ilang panginabuhian, utokan nga pagkatawo si Noel nigradwar siya sa kolehiyo nga nagdala og dakung dungog, kay siya man ang napili nga cum laude sa maong eskwelahan.

Sa kapobre ni Noel wala kini makapugong sa pagkab-ot sa iyang mga pangandoy, ug kini ang kasinatian nga iyang gipaambit ngadto sa uban, “Poverty is not a hindrance to success,” matud pa ni Noel, atol sa iyang paghatag og mensahe atubangan sa mga ginikanan, ug sa mga estudyante nga nitambong sa maong graduation.

Nanglabay ang mga katuigan usa ka adlaw niana, gikaila ni Noel si Merlenda. Si Merlenda ang maanyag nga maestra nga maoy hulip sa niretero nga magtutudlo nga si Mrs. Rowena Regalado, si Mrs. Regalado kauban ni Noel sa eskuwelahan nga ilang gialagaran, gibati ni Noel ang kaibog sa dalaga, ug iyang gidaygan sa iyang gugma si Merlenda.

“Pasayloa ako Noel, dili nako madawat ang imong gugma,” tubag ni Merlenda kang Noel sa gugma nga gitanyag niini. “Wala kaha ka masayop sa imong hukom Merlenda, nia na kanako ang tanan, ambongan ug labaw sa tanan titulado,” panghambog ni Noel sa iyang kaugalingon.

“Titulo nga wala gipaambit sa uban,” pintok nga tubag ni Merlenda dayon sulod sa iyang classroom. Nabato si Noel sa gipamulong sa dalaga, wala siya makatugkad kung unsay buot ipasabot niini, unya kalit nga nisantop sa hunahuna ni Noel ang iyang mga ginikanan nakatuaw siya, lima na ka tuig gikan sa iyang pagkamaestro, wala pa siya makatabang sa iyang nanay ug tatay. (Katapusan)