Maikag

Dear Tita Salie,

Tagoa lang ko sa ngalan nga Lorraine, 24, taga Negros Occidental. Mangutana lang ko ngano’ng duna may pobre ug dato? Abi nimo, pobre kaayo mi, kabus g’yud.

Maika’g lagi ko sa uban nga nindot og mga sinena ug labaw sa tanan makakaon og lami nga mga pagkaon. Paita g’yod ni’ng pobre ta Tita Salie. Unta dato ang tanan.

* * *

Hi Lorraine,

Angay ka nga mahibalo nga bisan unsa ka pa ka pobre duna pa’y mas pobre kun itandi nimo. Ang gikinahanglan lang mao ang pagkamaalamon. Pobre man o dato, ang importante duna kita’y mga suod nga higala ug labaw sa tanan nga mahimo kita nga suod ngadto sa Diyos.

Ang Diyos wala maglantaw sa tawo kun pobre man o dato. Alang kaniya sila’ng tanan wala’y kalainan. Busa ang pagkahimo’ng suod sa Diyos makatabang kini sa pagsagubang sa kawalad-on o kapobrehon.

Ang Diyos malipay sa pagbaton og mga higala nga nag-alagad kaniya. Sa pagkakaron gamita ang imong kusog ug panahon diha sa maayo. Ang Diyos nagsaad og kinabuhi diha sa usa ka bag-ong kalibutan diin wala na’y moingon nga pobre ako ug mag-ilaid sa kakabos. - Tita Salie