Bawal

Sukad naaberiya ang sakyanan ni Atty. Ben Dawat, ug wa pa nagawas sa talyer, taksi lang una iyang sakyan padulong sa husgado ug balik sa iyang bupete, kun motambong og bista. Tungod sa nilabay’ng kusog nga linog,ang mga husgado sa Sugbo nabalhin og laing bilding. Nia na sa Quimonda Building sa reclamation area.

Usa ka hapon, nitambong si Ben og bista. Ang iyang gilabanan si Lenlen nga iya rang housemaid nga dunay kaso sa yuta. Nag-abot ra sila sa Quimonda. Pagkahuman sa bista nag-uban sila’g sakay sa taksi. Unya nag-teks ang kapikas ni Ben, nga si Lenlen ipa-drop sa SM City aron magkuyog sila nga mag-grocery. Gisultihan ni Ben ang drayber.

“Sa Subangdaku unya ko Bay, apan ato unang ihapit akong kauban sa SM” ni Ben nga naglingkod tupad sa drayber. Si Lenlen tua sa luyo. “Ok lang attorney” sa drayber. Nakaila nga abogado ang pasahero kay gawas nga nagbarong, gikan pa gyud sa husgado. “Puwede og i-plug down nimo’g usab ang metro inig abot sa SM,” dugang ni Ben.

“Dili na puwede, Sir oy! Bawal na!” sa drayber. Naisa ang kilay ni Ben. Karon pa siya kadungog og taksi drayber nga niingon niini. Daghan na siyang drayber napangutana mahitungod niini ug niingon nga OK lang. “Tinuod na Bay? Basi’g niingon lang kang bawal kay abogado ko?” ni Ben. “Kadaghan na ko nitambong og seminar mahitungod ana attorney.  Bawal gyud na,” sa drayber.

Nakahukom si Ben nga mag-research mahitungod sa balaud niini. Kay may gireklamo na iyang misis sa LTFRB mahitungod niining taksi drayber nga kaduha mo-plug down. Unya gipaboran man sa LTFRB ang maong drayber. (Kataposan)