Giilisan og Kano

Dear Tita Salie,

Maayong adlaw. Ako diay si Esmoy, 30 years old. May ka live-in ko ug hilig kaayo mag-internet Tita Salie kay nakauyab man siya’g Kano unya gusto man siya’ng dad-on sa Amerika. Gibuwagan g’yud ko niya. Gisakitan g’yud ko’g maayo sa iyang gibuhat. Gusto unta nako siya’ng kuhaon pero mura’g wala na man ko’y mahimo. Palihug pasabta ko, Tita Salie, sa angay ko’ng buhaton. Thank you very much.

* * *

Maayong adlaw Esmoy,

Tinuod nga sakit gayud ang bation kun mobuwag nimo ang imong gimahal. Ugaling lang kay live-in lang kamo. Tinuod gayud ang imong giingon nga wala kay mahimo sa pagkuha kaniya og balik tungod kay wala man kay lig-on nga ebidensiya nga ikaw maoy tag-iya kay sa mata sa mga tawo, ug balaod sa tawo, labina sa balaod sa Diyos, dili man kamo kinasal.

Busa ang imong mahimo lang kun makapaabot ka nga mausab ang iyang hunahuna ug mobalik nimo, ikaw na ang magdesisyon. Apan kun dili ka makapaabot kay 30 years old ka pa man basin og aduna pa’y laing higayon nga nagpaabot nimo. Basin nga sa maong panahon, kini tinuod na gayud nga para kanimo.- Tita Salie