Gradwasyon sa GRO

Nahaiknat ang kilay ni Dindo. Wa gyud siya masayop sa iyang nakita, ilabi na nga nabati niya ang ngalan niini nga usa sa gitawag sa emcee sa seremonyas sa gradwasyon. Si Evelyn gayud! Migradwar sa kursong Accountancy ang GRO nga kauban sa iyang anak nga si Chester sa paggradwar.

Uban sa iyang asawa’ng si Linlin, way timik nga naglingkod sila si Dindo sa lower box sa Cebu Coliseum diin gipahigayon ang seremonyas sa gradwasyon sa tanang estudyante sa kolehiyo sa inila’ng unibersidad sa siyudad. Nahaunlod ang hunahuna ni Dindo. Si Evelyn mao ang guwapa, seksi ug bigot nga GRO sa usa ka night club dinhi sa siyudad nga nahimo niya’ng suki pinaagi sa binayrang kalipay.

Sa edad nga 50 ug usa ka meat supplier sa dagko’ng mga hotel ug restawran sa siyudad sa Sugbo, hilig si Dindo sa mga guwapa’ng GRO nga mahimo’ng bayran sa ilang mga presyo nga di ikatala og resibo.

“Pilay pa’y edad nimo, Eve....?” sukot ni Dindo kang Evelyn usa ka gabii niana human niya matsik-in ang GRO sa usa ka motel ug nadimdim ang katam-is niini.

“Disenuybe pa, Sir Dindo! Usa ko ka estudyante sa kolehiyo...!”

“Dugay na ka niining trabahoa...?”

“Niini’ng semestera lang, Sir Dindo! Napugos ko’g sulod pagka-GRO, human naparalisar ang akong papa sa atake sa hayblad sa among dapit sa Palompon, Leyte.

“Wala na’y nakatikad sa lima ka ektarya namo’ng basakan sa humay ug wala na makapadala si mama sa akong binulang alawans ug bayranan sa unibersidad! Usik kaayo nga di ko makagradwar ni’ng semestera...!”

“Magsuki na ta ha? Ayaw na’g kuyog og laing lalake’ng kustomer...!”

“Salamat, Sir! Ang imong ibayad nako dako na kaayo’g ikatabang aron ko makagradwar sa kolehiyo...!”

Nanindog sila si Dindo ug Linlin, diha’ng nahuman na ang seremonyas sa gradwasyon. Malipayo’ng nagpadulong kanila si Chester nga migakos dayon kanila. “Pa, Ma, karon kay nakagdradwar naman g’yud ko’s Accountancy, panahon na ‘sab nga ipaila-ila ko kaninyo ang akong girlfriend nga kauban ko’ng migradwar sa Accountancy...!” mapahiyomon si Chester nga mitawag sa iyang uyab si Evelyn!

Igo na lang nagkatinutokay sila si Dindo ug Evelyn. Apan wala magpasabot si Dindo sa iyang asawa ug kang Chester nga managkaila na sila si Evelyn.

Wa g’yud magdahom si Dindo nga ang suki niya’ng guwapa ug batan-ong GRO, mao diay ang uyab sa iyang bugtong anak nga dungang nigradwar sa ilang kurso’ng Accountancy. (Kataposan)