Panumpa nga bakak

Gula 9

“Hinuwaman ni nako Neth,” mubo nga tubag ni Jeffrey kang Janeth diha’ng gipangutana siya sa dalaga kun iya ba ang Mitsubishi Strada nga ilang gisakyan. Wala g’yud motuo si Janeth nga hinuwaman ra ni Jeffrey ang sakyanan.

Kun tan-awon ‘sab gud si Jeffrey, adunahan kini nga tan-awon kay mga mahalon ang iyang sapot ug ubang kagamitan. Gani dihang miagni si Janeth nga paubanon kini og pangaligo sa iyang mga barkada, diha-diha dayon nga mitanyag og litson si Jeffrey.

“Puwede nato hapiton ang tulo pa nako ka classmates?” ni Janeth pa nga tam-is kaayo’g pahiyom kang Jeffrey. “Sure, why not. Asa man ta?” gisukna ni Jeffrey si Janeth.

“Diha ra sa likud sa simbahan sa Mabolo. Agianan man ‘sab nato paingon sa beach. Adto ta mangaligo sa Stakili Beach sa Compostela,” matud ni Janeth. Mipasirit dayon si Jeffrey pagpadagan.

Nindot g’yud tuod sakyan ang Mitsubishi Strada nga gipahuwam kang Jeffrey sa iyang higala. Gihapit nila ang mga barkada ni Janeth.

Duha ka lalaki ug usa ka babaye. “Wala ka makabantay nga pares-pares man na sila, ako ra’y walay kapares kun wala ka miuban,” matud ni Janeth.

Abtik nga may misantop sa huna-huna ni Jeffrey. “Mag-uyab na kana  sila’ng tulo ka paresan?” iyang gipangutana si Janeth. “Unsa man diay, mosugot kaha na sila nga makig-partner og dili pa uyab?” ni Janeth.

“Sa ato pa, kay misugot ka man nga ako’y imong partner karon Neth, sabton ba nako nga uyab na ‘sab ta?” abtik kaayo nga nakahuna-huna og arangkada si Jeffrey. Milingi ug mipahiyom kaniya si Janeth. (Sumpayan)