Napan-os nga kahiubos

Ganagana lang ang pagsimba ni Cosme. Kasagaran, iya rang kapikas nga si Betty ang tigsimba. Dunay usa ka tuig nga wa sila’y palta sa pagsimba katulo sa usa ka semana. Kay duna man lagi gipangayo sa Kahitas-an. Tag alas singko sayong buntag sila tigsimba adtong tuiga. Miyerkules sa Redemptorist Church. Biyernes sa Basilica. Sa Domingo sa Guadalupe Church.  Apan kay wa tingale gihatag ilang gipangayo,  nabugnaw sila pagsimbasimba. Dili tataw kun unsay ilang gipangayo sa Diyos. Sila ray nasayod.

Unya karong hapona, Miyerkules, alas dos ang takna, si Cosme rang usa nisimba. Nihangyo si Betty nga magnovena ang kapikas.  Naospital si Betty kay dunay sakit sa kasingkasing.

Sa tiyempo sa pangalawat, nilinya si Cosme sa tungatunga nga pasilyo. Dihang lima na lang ka tawo ang naa’s iyang atubangan, natataw niya kinsa ang lay minister nga nanghungit og ostiyas. Wala lang niya usaba ang iyang hitsura. Apan nisurok gyud kadiyot ang iyang dugo nga nagtan-aw sa lay minister.

“Ang buang dako! Lay minister na diay ang tonto! Manghungit na’g ostiyas. Unya kaniadto, labihang hambogeroha! Labihang garbosoha!” tuaw niya sa hilom.

Dako kaayo iyang kahiubos ining Ram. Ram ra may iyang nailhan nga angga ining tawhana.  Napulo na ka tuig nga nagbalon siya’g kahiubos ining tawhana.

Sa wa pa sila namuyo sa Banawa, diha ang managtiayon puyo sa Capitol Site, dapit sa interior sa Escario. Silingan ni nila si Ram. Unya kay tubigtubigan, de kotse, medyo taas siya. Unya nag- abang la’g balay si Cosme duol sa ilang Ram. Apan hingamigo si Cosme, unya kadaghan na sila magsugatsugat sa karsada ining Ram, nakahunahuna si Cosme nga mouna og timbaya ni Ram.

“Bay, Ram. Maayong buntag, bay!”  ni Cosme. Nisaylo lang si Ram. Daw wa kakita ni kadungog ni Cosme. Sukad adto, wa na sab gyud nitagad si  Cosme sa silingan. Hangtud namalhin sila’g puyo dangtag usa ka tuig. Unya karon, lay minister na si Ram, paglabay sa napulo ka tuig.

Kaatrason si Cosme. Kabalhinon og laing linya. Apan daw may nihunghong nga gamay’ng tingog sa iyang konsinsiya.

“Grasya imong gipangayo sa simbahan. Kalimti na ang mga nanglabay. May kausaban ang tawo!” Tungod sa gamay’ng tingog, nadasig si Cosme.

“Brod Ram!” ni Cosme dihang nag-atubang na sila ni Ram.

“Brod Cosme!” ni Ram. Nagpahiyom na sila. “Ang lawas ni Kristo” ni Ram nga nagtunol sa ostiyas.

“Amen” ni Cosme, gidawat sa walang palad ang ostisya. Gipunit sa tuong kamot ug gihungit. Ug nakalugar pa gyud siya’g apir ngadtong Ram.

Naisang mga kilay sa mga nanglinya sa likod ni Cosme. Wa sila’y kalibutan sa kaagi sa duha, nga nagkahigala lang paglabay sa dugay’ng panahon sa kahilom. (Katapusan)