Panumpa nga bakak

Gitawgan ni Jeffrey si Janeth ug giingnan nga pahuwaton lang sa atubangan sa gate sa ilang tunghaan. Gipangutana siya sa dalaga kun dala na ba niya ang litson. “Sige mogawas na mi sa school,” ni Janeth.

Taud-taud, gipaandar ni Jeffrey ang hinuwaman niya nga Mitsubishi Strada ug pagkataud-taud, hinay kini nga gipadagan. Gikan sa P. del Rosario, miliko siya sa access road sa Barangay Kamagayan aron adto siya molusot sa Junquera Street.

Bana-bana ni Jeffrey nga inig-abot niya sa UC, nakagawas na sila si Janeth sa tunghaan ug anaa na kini magpaabot sa daplin sa karsada. Wala masayop si Jeffrey kay layo pa gani, nalantawan na niya si Janeth nga nagbarog kauban ang duha ka babaye ug usa ka lalaki.

Gitawgan niya si Janeth sa iyang cellphone. Nakita niya nga nagdali-dali pagtubag ang dalaga. “Duol na ko Neth,” matud ni Jeffrey. Natagbaw og lantaw ang grupo. Ang ilang gitutokan mao ang sakay sa mga taxi nga miagi kanila.

Mihunong si Jeffrey sa atubangan nila ni Janeth. “Asa ka man? Unsa nga taxi ang imong gisakyan?” pangutana sa dalaga. “Kini’ng sakyanan nga naa sa inyong atubangan, ako ni,” matud ni Jeffrey nga nagkatawa dungan sa pag-abli sa bildo sa bentana.

Napasiga ang mga mata ni Janeth ug ingon sa dili makatuo nga si Jeffrey ang nagmaneho sa sinaw kaayo nga Mitsubishi Strada. “Dali, diri ka sakay sa front seat ug sa luyo na lang ang imong mga kauban,” giingnan niya si Janeth.

Abtik kaayo nga miangkas sa likud nga bahin sa Strada ang mga kauban ni Janeth. Pareho sila nga nagngisi nga nakakita sa litson nga giputos og papel. “Imo ni’ng sakyanan Jeff?” ni Janeth. (Sumpayan)