Siya ug ako sa kangitngit

Gula 15

Human sa taudtaod nga pagpamalandong sa dautang nahitabo nako sa mga kamot ni agaw Paulo, mibalik ko ngadto sa sofa.

Akong nakita ang daghang dugo nga ingon sa nagluoy sa mahunol-hunol nga lingkoranan. Gikan kanako ang maong dugo. Timaan kini sa akong kaputli nga dili pa lang dugay napusgay.

Nakahilak na ‘sab ko samtang nagsud-ong niini. Unya gipahiran ug gilimpiyohan nako ang dugo sa sopa kay dili ko buot nga makita kini sa akong mga ginikanan.

Tingali’g ila ko’ng sukitsukiton kun ngano’ng may dugo sa sopa ug maligas ang akong dila pagtug-an sa tinuod. Lisud na kun mahitabo kini.

Human kalimpiyohi ang sopa nga nagkabulingit sa dugo, misulod ko sa banyo ug naligo.

Gusto ko’ng limpiyohan og maayo ang akong lawas. Gusto ko’ng mawagtang ang laway ni Paulo nga mipilit sa akong panit tungod sa pagkaligo niya’g halok nako. Gisabonan nako’g maayo ang tibuok ko’ng lawas.

Migawas ko sa banyo nga presko kaayo. Misulod ko sa akong lawak ug nag-ilis. Dayon miatubang ko sa tokador ug nanudlay sa akong buhok.

Samtang nagsud-ong sa akong nawong sa salamin, wala lang tuyoa nga nakahilak ko. Nahinumdom ko sa gibuhat ni Paulo nako.

Wala ko magdahom nga mabiktima ko sa panglugos karong adlawa. (Sumpayan)