State witness

Aron seguradong dili makonbikto imong anak, paningkamotan nako nga mahimo siyang state witness” ni Atty. Steve Tagok ngadto sa iyang kahinabi karong buntaga sulod sa iyang bupete. Magul-anon ug problemado ang hitsura ni Mr. Dario Garas nga naglingkod atubangan sa abogado. Nalambigit og kasong estafa ang iyang anak ulitawo nga si Archie, 19 anyos. Kasamtangang napriso kay wa pa kapiyansa si Archie, uban ni Eddie Parol, chiefmate (primero opisyal) ug Bert Malana, chief steward (mayordomo).

Nakahuman og kursong Nautical si Archie. Nadawat nga apprentice mate (agregawo) sa m/v Polaris. Kay kugihan, gihatagan siya’g laing responsibilidad sa bapor. Gihimo siyang purser (sobrecargo). Siya ang tigkolekta sa plete sa mga pasahero ug karga nga wa pa naisyuhi og tiket o bill of lading apan nakasakay na. Si Eddie ang cashier sa barko.

Si Bert ang custodian sa mga papeles sama sa mga ticket ug bill of lading. Sa kada biyahe, ang mga nakolekta ni Archie, gi-remit niya ngadto ni Eddie. Dangta’g usa ka tuig, gi-audit sila. Nadiskubrehan nga short sila’g P1.4 million. Nakiha sa kompaniya og estafa silang tulo.

“Unsa man nang state witness?”ni Dario. “Testigo sa gobiyerno. Kun way laing testigo nga makapakonbikto sa mga akusado, ang usa nila patestigoson batok sa tanan. Unya, wad-on ang kiha batok sa maong testigo. Kwalipikado si Archie” sa abogado. “Unsa may requirements aron mahimong state witness ang usa ka akusado?” ni Dario. “Una, gikinahanglan kaayo  ang iyang pahayag, ikaduha, way laing ebidensiya nga makaprobar sa krimen kun dili ang iya lang pahayag; ikatulo, ang iyang pahayag motakdo sa mga dokumento ug ubang ebidensiya; ikaupat, si Archie dili maoy pinakasad-an sa tanang akusado ug ikalima, wala’y laing kasong kriminal nga namatud-an siyang sad-an,” sa abogado.

Nakaginhawa’g luag si Dario. Kay wa si Archie nalambigit og laing kaso. Ang piyansa lang una ang ipalihok niya sa abogado. Kay usa ka semana na nga nabilanggo ang iyang anak. (Kataposan)