Tim-os nga pagbati - Gula 12

Nabasa ni Loreto gikan sa panagway ni Evelyn ang kasubo diha'ng gitug-anan niya sa iyang plano nga mohunong na sa negosyo nga pagpamalit og mga scrap kay molarga na siya paingon sa Manila.

"Ngano'ng mohunong ka man sa pagnegosyo og mga scrap Nong Retz nga nindot man ang dagan sa imong patigayon? Unya ngano'ng molarga ka man sa Manila? Mingawon g'yud ko nimo," matud ni Evelyn.

Gibuhian ni Loreto ang usa ka halawom nga pagpanghupaw. "Sukad masukad Lyn, karon pa ako mobati og paghigugma.

Ikaw maoy gipitik sa akong kasing-kasing apan nasiguro ko nga motamihid ka lang kanako."

Mura'g kalugmawon na ang mga luha ni Loreto tungod sa ka sentimental na sa sitwasyon. Mianam na gani sa paglughaw ang tingog ni Loreto nga nagpasabot nga hapit na g'yud siya kahilakon."

"Dako ang akong kalipay nga nakatabang ko nimo Lyn ug nga milampos ka na sa pagtungha sa koliheyo. Malipayon ko nga migradwar ka nga magna cum laude. Ayaw kabalaka Lyn, sa dili pa ako molarga, hatagan ko ikaw og kantidad nga magamit mo isip seed money," giingnan ni Loreto si Evelyn.

Takulahaw lang mihilak si Evelyn ug migakos kini kang Loreto. "Ayaw ko'g biyai Nong Retz. Mingawon g'yud ko nimo kun magkalagyo ta," matud sa dalaga.

"Sabta ko Lyn, mas labaw ko'ng masakitan kun magpabilin ko dinhi sa Sugbo kay makahandom ko sa kapakyasan ko sa una ug katapusan ko'ng gugma ngadto sa usa ka babaye nga mao ikaw," ni Loreto nga wala na gayud makapugong sa pagpangambak sa mga lusok sa luha  sa iyang mga mata. (Sumpayan)