Bililhon ang gugma

Valentine’s Day. Subo ang adlaw ni Nyor Victor karong buntaga bisan sa kasaulogan sa adlaw sa ilang kasal ni Nyora Liza. Nabalaka si Nyor Victor sa kahimtang sa ilang bugtong nga anak.

Mao nga nakahukom siya nga mobiyahe karong buntaga sa bukirang bahin sa lungsod sa Balamban. Iyang pakigkitaan si Justin aron kombinsihon nga mokuyog niya balik sa ilang panimalay. Sa ilang biyahe sakay sa kaugalingon niyang sakyanan milayat ang iyang hunahuna duha ka bulan ang milabay.

“Valerie, buwagi si Justin. Hinuon dili na kadto mobalik dinhi sa ato, kay akong gikasab-an,” asoy ni Nyor Victor sa bugtong niyang anak.

“Dili na gani mopakita si Justin, nako Papa, wa nay bili nako ang kinabuhi. Ayaw unyag mahay,” bahad ni Valerie sa iyang amahan.

Dinhi sa barangay Monteller sakop sa lungsod sa Alegria si Nyor Victor maoy giila nga sapian. Ubos ang pagtan-aw ni Nyor Victor sa uyab sa iyang anak. Mao nga iyang gidispatsar. Sa laing bahin gitinuod ni Valerie ang iyang bahad. Hapit tanang higayon nagluklok siya sa iyang lawak ug nawad-a’g gana sa pagkaon. Hinungdan nga mihugo ang iyang panglawas nga gikabalak-an sa iyang amahan.

“Nyor, miabot na kita, sa adres nga imong gihatag,” pulong sa iyang drayber nga nakapamata ni Nyor Victor sa iyang pagduhiraw.

Ilang natumbok ang balay ni Justin dihang nakita ni Nyor Victor ug sa iyang drayber ang pagkanaog ni Justin sa ilang SUV nga gikang nanimba kauban sa iyang ginikanan. Nakurat si Nyor Victor sa iyang nakita. Nangayo siya’g pasaylo ni Justin ug gisultihan sa problema. Mikuyog si Justin sa pag-uli ni Nyor Victor.

“Happy Valentine’s, Valerie!” timbaya ni Justin ngadtong Valerie  nga padulong sa lamesa aron saw-an ang gitaganang pagkaon.

“Happy Valentine’s sab Justin!” balos ni Valerie nga hugot nga migakos ni Justin.

Nahimuot si Nyor Victor nga nagsud-ong sa iyang anak nga malipayon. Mibathay ang matam-is niyang pahiyom. Ug namatud-an nga bililhon ang gugma. (Kataposan)