Mitalaw si Leo Isog

Mibangon ang luyang gibati ni Mr. San Juan dihang nadawat niya ang  balita nga umaabot si Leo Isog. Nangatawa ang  iyang mga alalay nga nakita ang ilang bosing nga mibalik ang kaisog. Sukwahi sa milabay’ng mga adlaw nga kurog ang kalawasan sa nahitabong welga sa iyang mga trabahador.

“Bay Joebert, maayo nga mibalik ang kadasig ni Sir Boy,” taho ni Eman.

“Nakuha man ni Oniox, si Leo Isog, nga moatiman sa mga trabahante ni Sir Boy, sa mina niya sa karbon, didto sa bukid, nga mi-welga,” ni Joebert.

Nabaniog ang ngalan ni Leo Isog nga way gikahadlokan. Daghang welga batok sa kompaniya iyang natabangan. Sa iyang presensiya way pangulo sa unyon nga dili mobahag ang ikog. Maoy hinungdan nga gitawag siya’g Leo Isog.

“Salamat kaayo nga miabot ka, Brod Leo, basin makatabang ka sa akong problema,” pahaba ni Mr. San Juan.

“Way problema, Sir Boy, dali ra nato, masulbad,” pagarpar ni Leo Isog.

Gimandoan ni Mr. San Juan ang iyang mga tawo nga ubanan si Leo Isog sa bukid.

Sakay sa SUV nga gimaneho ni Eman gihitsasan ni Mr. San Juan sa armas si Leo Isog. Uban kaniya ang mga tawo ni Mr. San Juan nga silang Noe, Junjun, Kevin, Raven ug Daryl. May dala sab silang pistola.

“Mga higala, miabot na ang mga tawo ni Mr. San Juan. Gamay nga sipyat, hapsi dayon,” mando sa lider sa union.

Sa unang higayon mikurog ang tuhod ni Leo Isog. Nakita niya ang mga welgista nga may dalang pinuti. Sa kinidlap sa hait nga pinuti wa kalihok si Leo Isog.

“Mibalik man lagi mo dayon Leo, misurender dayon ang mga welgista,” ni Mr.San Juan nga gibati’g dakong kalipay.

“Kaduha nako maigo sa bala sir Boy, pero wa ko mahadlok. Apan sa kinidlap sa hait nga pinuti sa mga welgista, mitalaw ko,” pintok nga pulong ni Leo Isog nga nakapaluya’g balik sa kalawasan ni Mr. San Juan. (Katapusan)