Sulagma nga deyt

Gula 6

Nindot kaayo ang nahimutangan nila ni Aldrin ug Jenny kay gawas nga nag-umbaw kini ngadto sa pantalan nga klaro kaayo nila nga makita ang dagat, gisalimbongan usab sila sa mga dahon sa bombil.

Kay mianam na man sa pagtikyop ang kangitngit, wala na magsilbi ang dan-ag sa suga didto sa unahan ug mao kini ang ampay sa managhinigugmaay.

Wala gayud lung-i sa paggakus ni Aldrin si Jenny. Anam-anam nga gipaduol ni Aldrin ang iyang lips ngadto sa mga ngabil ni Jenny. Mainampingon usab nga gisugat ni Jenny ang mga ngabil sa iyang boyfriend.

Human magkatagbo ang masig nila ka mga ngabil, gibuhian nila ang matam-is kaayo nga pahiyom ug unya naginaksanay sila pag-usab. Niini’ng higayona, mibawos na paggakus si Jenny kang Aldrin.

“Human karon sa Valentine’s Day, putlon na ba nato ang atong relasyon Aldrin?” gisukna ni Jenny ang iyang boyfriend. “Dili uy!” pintok nga tubag ni Aldrin.

“Dili ba miingon man ko kaganina nga lauman nako nga bisan human sa Valentine’s Day magpadayon unta ang duha nato ka gugma nga magminahalay sa usa’g-usa ug sa umaabot nga panahon hiusahon nato ang atong mga damgo diha sa salag sa kaminyoon,” ni Aldrin pa.

Wala makapugong sa pagkatawa si Jenny nga namati sa gisulti ni Aldrin. “Mura ka g’yud sa akong amahan sa Bohol nga maadyo gadyud nga mobalak,” matud ni Jenny.

Gihagkan ni Aldrin si Jenny. “Kanindot niini’ng lugara nga atong nahimutangan uy. Makita nimo nga ang mga buwak nga nagsalimbong kanato ingon sa nangiay-kiay sa kamalipayon dungan sa huros sa mabugnaw’ng huyohoy,” ni Aldrin. (Sumpayan pa)