Sulagma nga deyt - Gula 3

Misaka sila si Aldrin ug Jenny didto sa ibabaw sa paril nga gihimo sa karaang mga bato. Nakita nila ang lainlaing mga lalaki ug babaye nga nagpares-pares ug ang uban nagpahipi sa mga tanom nga maoy naghatag og katahom sa Fort San Pedro.

Gilantaw nila ni Aldrin ug Jenny ang nahimutangan nila kaganina didto sa Plaza Independencia nga tupad ra g’yud sa karaang kampo sa mga sundalo’ng Kastila. “Kanindot diay dinhi sa taas sa Fort San Pedro no? Kun wala pa mo namo makaila, tua ra mi didto sa plaza,” matud ni Jenny.

Nalantawan nila didto sa unahan nga si Emil ug ang iyang partner nga kauban ni Jenny nagtupad sa paglingkod niadto’ng karaang kanyon. Unya, nakita ni Aldrin nga nanindog ang babaye’g lalaki nga diha nagyaka sa unahan kanila’g dyutay.

Nanglakaw ang babaye’g lalaki nga nag-agbayay. “Mopuli ta didto paglingkod kay bermuda ang sagbot diha,” giingnan ni Aldrin si Jenny.

Nindot g’yud tinuod ang mao nga lugar kay samtang sila naglingkod sa pino kaayo’ng bermoda, ingon sa gidayan-dayanan sila sa mga buwak sa bombil nga nagyungyong ang mga sanga.

“Kanindot ‘sab anang mao nga building no? Naa may mura’g barko sa kinatumyan,” wala makapugong si Jenny sa pagdayeg sa mao nga talan-awon. Ang disinyo nga barko sa ibabaw nga andana sa Mariner’s Court dapit sa pantalan maoy gipasabot ni Jenny.

Gikan sa ilang nahimutangan, makita nila ang dagat nga maoy nag-uwang sa dakbayan sa Sugbo ug sa dakbayan sa Lapu-Lapu. “Mahinumdom man lang ko sa amo sa Bohol kun makakita ko og dagat,” matud ni Jenny. “May uyab ka ba nga gibiyaan didto sa inyo sa Bohol Jen?” gipangutana ni Aldrin si Jenny. (Sumpayan)