Sulagma nga deyt

Nagkuyog ang duha ka magbarkada nga si Emil ug Aldrin sa pagpanuroy sa Plaza Independencia sa miagi’ng Valentine’s Day. Pareho sila nga wala’y mga girlfriends mao nga namasin sila nga makakaplag og babaye nga wala ‘say Valentino.

Igmat ang ilang mga mata kun kinsa kadto’ng mga babaye nga wala’y partner. Hapon pa gani, didto na sila nagpahimutang sa sementado nga lingkoranan, ilawom sa kahoy nga daghan kaayo og gamot.

Daghan nga mga babaye’ng nanuroy sa plaza nga walay mga partners, apan nagtuo ang maghigala nga ang mao nga mga babaye nagpaabot lang sa ilang mga Valentino. Tingali, anha sila magtagbo sa Plaza Independencia ug wala pa lang mahiabot.

Giabot og kalaay sa pagliningkod, nakahukom sila nga magsuroy-suroy. Girombo nila ang lima ka babaye nga nanagtindog lang ug nalingaw sa pakigsultihanay.

“Hi chicks, happy Valentines,” timbaya ni Aldrin sa mga babaye. “Happy Valentines ‘sab,” mitubag ang usa sa mga babaye. “Wala pa mangabot ang inyong mga Valentino?” gisukna ni Emil ang mga babaye.

“Wala pa mi makakita, basin karong taud-taod dunay moduol,” tubag sa laing babaye nga milingi ni Aldrin. “Kami ‘sab wala’y Valentina. Basin og kita lang ang mag-uban-uban kun tinuod nga wala mo’y partner,” matud ni Emil.

Gigamit dayon ni Aldrin ug Emil ang ilang pagka-estoryador. Tumong nila nga malingaw ang mga babaye kanila ug dili abuton og kalaay.

Tuod, wala mosipyat si Aldrin kay lingaw kaayo ang mga babaye sa ilang palabas. “Nagsige lang ta og estoryahay apan wala ta magkaila,” matud ni Emil nga mipaila sa ilang mga ngalan. Nagpaila usab ang mga babaye.

“Tinuod ba nga wala kay Valentino karon Jen? Kita la’y mag-partner ron?” matud ni Aldrin nga ingon sa nakursonada kang Jenny nga buwagaw og buhok. (Sumpayan)