Dili mahiluna

Dear Tita Salie,

Tagoa lang ko sa ngalan nga Shiela Traya, taga Luray 1, Toledo City. Kini’ng akong pangayoan og tambag kanimo mahitungod sa akong BF nga nakaila pinaagi sa text. Wala pa gayud mi magkita sukad. Nagproblema ko kay na in-love man ko niya bisan sa tingog lang. Dili g’yud ko mahiluna kondili siya manawag. Grabe na g’yud ni, Tita Salie. Unsa kaha’y maayo ko’ng buhaton? Palihog pasabta.

* * *

Good day Shiela,

Palandonga kini’ng tulo ka matang sa pagbati. Una, atraksiyon. Naibog ka kay nindot og tingog apan ang mahinungdanon ang batasan sa usa ka tawo. Tungod sa iyang nindot nga tingog nagtuo ka na nga nahigugma ka kaniya.

Ang “infatuation” hinumdomi nga nadani ka tungod lang sa mga hiyas sa usa ka tawo. Dili kini makakita sa kahuyangan ug dili kini molungtad og dugay. Ang gugma makakita sa maayo ug sa dili maayo’ng mga hiyas sa usa ka tawo.

Shiela, ang imong gibati maoy infatuation lang ug dili kini tinuod nga gugma. Ang infatuation molubad ra apan ang tinuod nga gugma mas molig-on samtang magkadugay ug mahimo’ng usa ka hingpit nga bugkos sa panaghiusa. Ayaw pagdali-dali, makasalig ka nga makakita ka ra niana’ng matanga sa gugma. - Tita Salie