Kinse minutos

Nagpaniid lang si Sopring sa tulo niya ka pasahero. Nipara sa iyang taksi nga gimaneho duol sa Macdo dikit sa gasolinahan  sa Basak, Mandaue. Alas otso sa buntag pagsakay nila ug nagbagolbol na ang batang babaye, 9 anyos, nga late na siya sa klase.

“Ingna lang unya inyong maestra Inday, nga naaberiya atong sakyanan” sa babaye nga tupad sa bata.

Naglingkod sila sa luyo nga lingkuranan sa taksi. Ang lalaki nga sayisintahon og pangedaron, naglingkod sa front seat. Mga apohan sa bata ang mga kuyog niya kay nakadungog si Sopring nga gitahod niya’g lola ug lolo. Sa tan-aw ni Sopring, dili garbusohon ang mga pasahero. Iyang gipakighinabian.

“Hain man diay inyong sakyanan, sir?” ni Sopring ngadto sa tupad niya. “Tua sa basement nga parkingan sa Seventh Day Adventist School atbang sa Kapitolyo, diin magtungha among apo” sa lalaki. “Unsa may diperensya sa inyong sakyanan?” ni Sopring samtang nagmaneho.

“Nadaut ang power steering. Di na ko kadaug og liso sa manobela. Isulod nalang namo sa casa,” sa lalaki. Daw may bombelya nisiga sa ibabaw sa ulo ni Sopring. Nagkinahanglan siya’g P1,000 para sa tuition fee sa iyang anak. Kanunay na lang siya nipirma og promissory note. Dili na kuno dawaton iyang promissory note sa eskuylahan. Kining pagdrayeb og taksi, sama ra man sa namasol. Usahay daghang kuha. Usahay, wala.

“Nagkinahanglan tingale mo’g towing service aron masulod sa casa ang inyong sakyanan?”ni Sopring.

“Malagmit. Dos mil pesos kuno’y bayranan sa towing” sa lalaki.

“Ako lay drayeb ana sir, padulong sa casa. Ibilin ko lang ang taksi kadiyot sa parkingan sa basement” tanyag ni Sopring. Kulba hinam ang gibati. Nakasinati man siya’g maneho kaniadto og dekarga nga way power steering. Kaya niya ang light vehicle.

“Kun kaya nimo, OK. Pila may imong pangayoong suhol?” sa lalaki.

“P1,000 lang sir. Katunga sa presyo sa towing” ni Sopring. “Ok,” sa lalaki. Hilom nga nakapasalamat si Sopring sa Kahitas-an. Isuzu Crosswind ang sakyanan nila. Pagsulod nila sa casa duol sa Ayala Business Park, gihatagan dayon si Sopring og P1,000 sa lalaki.

“Salamat kaayo ninyo, sir, maam” ni Sopring dalang hana og yukbo. Nipasiklap siya sa iyang relo. Kinse minutos lang ang nakalabay gikan sa parkingan hangtud sa casa. Sa hamubong panahon nakakuwarta siya’g usa ka libo. “Maayo untag magpirmi!” tuaw niya sa hilom. (Katapusan)