Gugma sa bitin

Gula 5

Nalingaw kaayo sila si Roland ug Kenneth sa ilang pagpanuroy human sa Sinulog Grand Parade. Wala lang gani sila makaalinggat sa oras nga paspas kaayo ang pagtuyok ug hapit na ang tunga’ng gabii. Bisan og lawom na ang kagabhion apan puwerte’ng daghana pa’ng mga tawo. Alegre g’yud kaayo ang dakbayan sa Sugbo atol sa kapistahan ni Santo Niño. Nangaon sila sa usa ka fast food restaurant nagbaligya og mga inasal nga manok.

Mura’g suod na gayud sila kaayo si Kenneth ug Roland kay nagkinamot na lang gani ang dalaga samtang nangaon sila ug ang iyang bag-ong higala. “Gikan dinhi, anha ta diha sa atbang muinom ta’g  tagsa ka botelya’ng beer,” giingnan ni Roland si Kenneth.

Wala mobalibad ang dalaga. “Nakasuway ka na ba nga muinom og beer Kenn?” gipangutana ni Roland ang iyang amiga. “Nakasuway na ko kadto’ng nagkuyog mi ug ang akong mga barkada,” matud ni Kenneth.

Tuod, miadto sila sa atbang nga dunay daghang nanag-inom og beer. Daghan ang diha na sa gawas sa tindahan mag-inom kay puwerte’ng daghana nga mga kustomer. Gikatupad nila sa pikas lamesa ang batan-ong babaye uban sa iyang partner nga loving kaayo. Nakabantay si Roland nga may mga higayon nga mopasiklap si Kenneth ngadto sa maghigugmaay nga nagparayganay. Nakahuna-huna si Roland nga iyang komedyahan si Kenneth. “Makaibog tanan-awon no?”

Mipahiyom si Kenneth nga mipasiklap kang Roland. Gi-deliver ang ilang gi-order nga light beer. Unom ka botelya ang gihatud. “Hala, daghan lagi ang imong gi-order Lan?” matud ni Kenneth nga nahibulong.

“By set man diay ang order, bali og unom ka botelya,” pasabot ni Roland. Miinom sila sa bugnaw kaayo’ng beer. (Sumpayan)