Kun magdulog...
Dear Tita Salie,
Maayong adlaw. Usa ko sa nalipay nga may column sama niini kay aron duna ta’y kapangayoan og tambag sa atong mga suliran nga lisod isulti ngadto sa uban.
Ako si Jerrex, minyo na. Ang akong problema mao kini’ng kabahin sa akong misis. Akong namatikdan nga kun magdulog mi, dili siya malipay. Mura’g dili na man siya ganahan nako.
Unsay buhaton ko, Tita Salie? Palihug pasabta ko.
Hello,
Maayo’ng adlaw, Jerrex. Duna lang ko’y duha ka mga paagi o sekreto sa kalipay sa kaminyoon. Una, ang pagbaton ug pagtahod sa usa’g-usa. Isip bana, ihatag usab niya ang respeto ngadto sa asawa. Ihatag ngadto kaniya ang kalipay nga gusto usab niya, ug dili kalipay sa bana ra ang huna-hunaon.
Susihon ninyo ang matag usa ug pamalandonga ang giingon sa kasulatan sa Proverbio 5:15 “Inom og tubig gikan sa imong biyawan ug sa dinagayday gikan sa imong kaugalingong atabay.”
Ug ang ikaduha ang komunikasyon. Basin og kulang mo sa komunikasyon. Ang giingon sa Proverbio 16:24 “Ang maayong mga pulong matam-is sa kalag ug makapaayo sa kabukogan.”
Busa importante ang komunikasyon. Ang mahigugmaong bana angay makig-estorya sa iyang asawa mahitungod sa iyang kalihokan, iyang mga suliran, iyang mga panglantaw bahin sa lainlaing mga butang. Usa gayud kini ka paagi aron ang asawa malipay gayud sa bana.
-- Tita Salie
- Latest
