Gugma sa bitin

Igo lang mipahiyom si Roland diha’ng nangayo’g pasaylo kaniya ang maanyag nga babaye nga nakaigo kaniya sa pagpaningkamot nga dili kini mabag-iran sa mituyhakaw nga bitin nga ilang gitan-aw.

Ang tinuod, wala siya masakiti sa pagkaigo sa pagwakli sa babaye sa iyang bukton. Nakahuna-huna si Roland nga komedyahan niya ang babaye. Miatras siya’g gamay ug mainampingon niya nga gihapyod ang bukton sa babaye. Wala siya mosipyat kay nahaigking na ‘sab ang babaye ug nakuyawan. “Ayaw uy! Gikuyawan baya g’yud ko kay abi ba nako’g bitin na ang mikamang sa akong bukton,” matud sa babaye. Duha man gud ka bitin ang gikalingawan sa mga tawo.

Ang usa ka yellow nga bitin ang gidak-on mura’g paa sa utso anyos nga bata, samtang ang laing usa ka puntik-puntik ang kolor, mura pa og kadako sa bukton sa bata. Gipanid-an ni Roland ang babaye ug iyang nasuta nga wala kini kauban.

“Hikapa miga ang lawas sa bitin aron dili ka na mahadlok,” gitambagan ni Roland ang babaye. “Dili ko uy! Danglog kaayo na, pangilogan ko mohikap,” sa babaye pa. Gihikap ni Roland ang bitin aron mosundog kaniya ang babaye.

Tuod, hinay’ng gihikap sa babaye ang bitin pinaagi sa iyang usa lang ka tudlo. Didto nagkasuod si Roland ug ang babaye. “Wala kay kauban miga?” gipangutana ni Roland ang babaye.

“Wala, ako ra usa kay ang akong amiga ambot hain na,” matud sa babaye. Nagpaila si Roland ngadto sa babaye ug ang babaye mitug-an usab sa iyang ngalan. “Kenneth ang akong ngalan Roland,” matud sa babaye.

Nakahuna-huna si Roland nga dapiton niya si Kenneth nga adto sila manan-aw sa sayaw sa mga Sinulog dancers sa Cebu City Sports Center. “Dia ko’y duha ka ticket sa sports center, kuyog ta,” giingnan ni Roland si Kenneth. (Sumpayan)