Gasa ni Santo Niño

Naghilak nga gisunog ni Rowena ang gi-andam niyang senina sa bata, dili siya buot nga mahinumdom sa nahitabo sa iyang anak nga ihimugso unta niya atol sa kapistahan si Señor Santo Niño.

Matag Biyernes walay sipyat si Rowena sa pagsimba, moadto gayud siya sa Basilica Del Santo Niño, aron pangayoon sa gamhanang bata nga makabaton na siya og anak. Baog si Rowena matud pa sa mga doctor nga naghiling kaniya, ug bisan kanus-a dili siya mahimong magsabak, busa sa dihang namabdos siya daw sa gibayaw sa tumang kalipay si Rowena, apan ang kalipay nga iyang gibati lumalabay lamang kay sa kalit lang nahulog ang bata gikan sa iyang sabakan nga maoy gikaguol pag-yo ni Rowena. “Rowena unsa kanang imong gibuhat?! Nganong gisunog nimo ang senina sa bata? Pangutana ni Rafael nga nakurat sa gibuhat sa iyang asawa.

“Wala’y paglaom nga makabaton pa ako og anak Rafael, busa sunogon ko kining senina sa bata aron dili na ako mahinumdom sa akong anak,” tubag ni Rowena ngadto sa iyang bana nga nagmahay pag-ayo sa Ginoo.

Unya paglabay sa pipila ka mga minutos nahibulong pag-ayo si Rowena kay naugdaw na lang ang mga layang  palwa sa lubi nga iyang gisugnod, apan igo lang nipula ang senina sa bata  ug wala kini masunog sa kalayo, gihipos na lang ni Rafael pagbalik ang senina sa bata, unya gihangyo niya ang iyang asawa nga moadto sa  Basilica, aron pagsimba, ug mangayo’g pasaylo sa Ginoo, kay kini ang gibasol sa nahitabo sa iyang anak.

Apan samtang diha sila sulod sa simbahan kalit nahasiga ang mata ni Rowena sa iyang nakita, kay ang senina nga gisul-ob ni Señor Santo Niño nga kolor pula, susama gayud kini sa senina sa bata nga iyang gisunog nga wala dutli sa kalayo, diha-diha kalit may kabugnaw sa hangin nga misapigad sa dalunggan ni Rowena uban sa gamay’ng tingog nga iyang nadungog.

“Hugta ang imong pagsalig, ug ampingi ang pulang senina sa bata nga imong gisunog, gasa ko kadto kanimo, magamit mo ra kadto sa umaabot nga mga adlaw, matud pa sa tingog nga nakigsulti kaniya. Mihilak nga nangayo’g pasaylo si Rowena kay nasayod siya nga ang tingog nga nakigsulti kaniya tingog sa gamhanang bata nga si Señor Santo Niño. (Kataposan)