Salamat sa pabuto

Gula 15

Mapahiyumon nga naglantaw ang inahan ni Zeny kanila ni Ruben samtang nag-atang og bus nga masakyan paingon sa dakbayan sa Sugbo. Nasiklapan ni Ruben ang inahan ni Zeny nga nagsud-ong kanila ug mao nga iya na lang ‘sab nga gipahiyoman.

Nakasabot si Ruben nga ingon sa nagduda na ang inahan nga may relasyon sila si Zeny. Samtang nagdagan ang bus paingon sa dakbayan sa Sugbo, nagkalingaw og sultihanay ang maghigugmaay.

“Gipangutana baya ko ni Mama gabii bahin nato’ng duha kay nakabantay kuno siya nga suod na kaayo ta,” matud ni Zeny. “Unya unsay imong gitubag?” abtik nga tubag ni Ruben.

Wala dayon motingog si Zeny apan sa ngadto-ngadto iyang giingnan si Ruben nga wala niya ilimod sa iyang inahan ang ilang relasyon. “Wala sila’y pagsupak si Papa sa atong relasyon. Hinuon gipahimangnoan ko nila nga magbantay aron dili mahisukamod pag-usab,” ni Zeny pa.

Dapit sa bentana sa bus maglingkod si Zeny ug mao nga nakahigayon g’yud si Ruben sa pagsikit pag-ayo sa iyang girlfriend. Ang nagdikit nila nga mga lawas maoy nagsugnib og talagsaon nga kainit. “Gusto ko Zen nga sa sunod nako nga pagkanaog sa barko, magpakasal na kita. Niana’ng higayona, aduna na ko’y igo-igo nga tinigom,” giingnan ni Ruben si Zeny.

Milingi si Zeny kang Ruben dala ang tam-is kaayo nga pahiyom. Nakapasamot kini sa gibati’ng kahinam sa ulitawo nga seaman. “Moderitso na lang ta sa usa ka hotel ha? Adto na lang ta mo-order og pagkaon,” matud ni Ruben samtang gihikap niya ang suwang ni Zeny.

“Ikaw gud. Basta pagmatinud-anon sa imong mga saad,” matud sa dalaga. (Sumpayan)