Real party in interest

Sumala sa balaod, kinahanglan ang kaso pagaapilan lang sa real party in interest. Ang kihante ug ang sinumbong maoy giila nga real party in interest. Sa ato pa, tawo nga interesado o may interes o katungod sa kaso. Ang tawo pagailhon nga real party in interest kun ang resulta sa kaso, makaayo o makadaut niya.

Sama sa usa ka kaso mahitungod sa pagpatitulo sa yuta. Sa wa pa ang Ikaduhang Gubat sa Kalibutan, may mga yutaan nga nagpatitulo og yuta. Apan wa pa gani naisyu ang titulo, gibaligya  na nila. Mao ni ang gibuhat ni Sergio Manto.

Nigawas iyang titulo sa tuig 1939. Pero sa 1936 pa lang, iya nang gibaligya sa laing tawo iyang yuta. Unya,sa paggubat sa 1941 ang Kapitolyo diin nahimutang ang mga titulo sa yuta, gihimong garrison sa mga sundalong Hapon. Gipangsunog nila ang mga titulo.

Tungod kay nawala ang mga titulo, sa paghuman sa gubat, ang gihimo sa nakapalit nga si Yul Donsol nagpaisyu og  Tax Declaration sa yuta sumala sa Deed of Sale pabor niya nga pinirmahan ni Sergio ug notaryado. Si Yul na ang nagbayad sa buhis gikan sa pagpalit niya hangtud karon.

Karong kabag-ohan, patay na si Sergio. Duna siya’y apo nga nideklarar nga heredero siya ni Sergio. Nagpetisyon si Julito Manto sa RTC sa pagpatitulo sa yuta base  sa nakuha niyang mga dokumento gikan sa Land Registration Authority (LRA) sa Quezon City, nga nagmatuod nga si Sergio ang tag-iya sa yuta ug maoy nakapatitulo niini.

Gibabagan ni Yul ang petisyon ni Julito pinaagi sa iyang abogado. Matud ni Atty. Terence Yogo dili real party in interest si Julito Manto kay sa buhi pa si Sergio, gibaligya na niya ang yuta. Wa nay katungod si Julito nga manunod sa yuta nga wala na sa poder sa iyang lolo. Gibasura sa huwes ang kaso ni Julito. Kay nakumbinsi ang huwes nga wala nay katungod o interes si Julito sa yuta. Dili makaayo o makadaut niya ang resulta sa maong kaso. Kay wala siyay katungod sa yuta nga nalambigit. “He was not able to prove that he is a real party interest in this case” matud sa huwes. (Kataposan)